येँ – नेपालभाषाया अभियन्तालिसें सक्वया न्ह्यलुवाः राजदास श्रेष्ठ मन्त । वय्कः ७४ दँया बैंसय् म्हिगः चान्हय् सुष्मा कोइराला मेमोरियल अस्पतालय् मदुगु धकाः सक्वया समाजसेवि विजय भाष्कर श्रेष्ठया लिसें संस्कृतिविद् प्रकाशमान सक्वं जानकारी बियादिल ।
शंखरापुर नगरपालिकाया नां पुनर्स्थापना यायेगु निंतिं आमरण अनसन तकं च्वनादीम्ह वय्कलं नेपालभाषा साहित्य ख्यः च्वन्ह्याकेगु निंतिं न्ह्यथने बहःगु योगदान यानादीगु दु । वय्कलं थः गुरु महाकवि गिरिजा प्रसाद जोशीया थी थी पिमदंनिगु सफूत पिथनेगुया लिसें महाकवि गिरिजा प्रसाद प्रतिष्ठान, नेपालभाषा एकेदेमि लिसेंया थी थी संस्थायात आर्थिक ग्वाहालि नं यानादीगु खः ।
अथे हे नेपालभाषाया साहित्यकारपिन्त सफू पिथनेगु निंतिं हःपाः व आर्थिक ग्वाहालि यायेगुया लिसें यक्वं सिरपाःया पलिस्था नं यानादीगु खः ।
पेशागतकथं वय्कः छम्ह ज्वः मदुम्ह केमिकल इन्जिनीयर जुयादी, लिपांगु इलय् वय्कः कृषि कर्मय् सक्रिय जुयादीगु खः ।
