काठमाडौँ महानगरपालिकाले यस वर्षको जनबहाःद्य (सेतो मच्छिन्द्रनाथ) रथयात्रालाई थप भव्य र व्यवस्थित बनाउन विशेष तयारी सुरु गरेको छ।
कार्यवाहक प्रमुख सुनिता डंगोलको अध्यक्षतामा बसेको तयारी बैठकले जात्राका लागि प्रदान गरिँदै आएको आर्थिक सहयोग १० लाख रुपैयाँबाट वृद्धि गरी २० लाख रुपैयाँ पुर्याउने निर्णय गरेको छ।
यो जात्रा महानगरका ९ वटा वडाहरूमा सञ्चालन हुने भएकाले मार्ग व्यवस्थापन, सरसफाइ र शान्ति सुरक्षालाई उच्च प्राथमिकतामा राखिएको छ।
बैठकमा सहभागी काठमाडौँका प्रमुख जिल्ला अधिकारी ईश्वरराज पौडेलले सुरक्षा संयन्त्रलाई चुस्त बनाइने प्रतिबद्धता जनाउनुभयो भने सम्पदा समितिले सडक मर्मत र श्रद्धालुको सहजताका लागि काम गर्ने जिम्मेवारी लिएको छ।
सांस्कृतिक परम्परा अनुसार यस वर्षको रथयात्रा चैत १२ गते केलटोलबाट खट यात्राका साथ सुरु हुनेछ। जमलस्थित तीनधारा पाठशाला अगाडि निर्माण गरिएको रथमा सेतो मच्छिन्द्रनाथको मूर्ति प्रतिस्थापन गरेपछि असनतर्फ रथ तानिनेछ, जहाँ सोही रात राष्ट्रपतिबाट दर्शन गर्ने कार्यक्रम तय भएको छ।
जात्रा व्यवस्थापन समितिका अनुसार चैत १३ गते असनबाट हनुमानढोका, १४ गते लगन र १५ गते लगनकै परिक्रमा गराइनेछ। अन्ततः चैत १६ गते मूर्तिलाई पुनः खटमा राखेर विभिन्न भित्री सहर हुँदै जनबहाल पुर्याएपछि यो धार्मिक उत्सव समापन हुनेछ। वर्षा र सहकालका देवता मानिने मच्छिन्द्रनाथको यो जात्राले समाजमा शान्ति, समृद्धि र आरोग्य ल्याउने जनविश्वास रहेको छ।
