न्हय्क्वःगु हलिं नेवाः न्हिया लसताय् वर्ल्ड नेवाः अर्गनाइजेशनंं हलिं नेपालभाषा चिनाखँ मुंज्या याइगु जूगु दु । वइगु नेपाल संवत ११४४ चिल्लागाः पन्चमि, सनिबार (चैत्र १७ गते), चिल्लागाः द्वादसि, सनिबार (चैत्र २४ गते), चौलाथ्वः पन्चमि, सनिबार (बैशाख १ गते) व चौलाथ्वः द्वादसि, सनिबार (बैशाख ८ गते) यानाः प्यंगू सनिबारखुन्हु जूमपाखें चिनाखँ मुंज्या जुइगु धकाः अर्गनाइजेशनया नायः संयुक्त श्रेष्ठं धयादीगु दु ।
मुंज्या नेपाःया ईकथं बहनी ८ ताः ईनिसें न्ह्याइ ।
श्रेष्ठया कथं, कवयित्री प्रतिसरा साय्मिया संयोजनय् जुइगु चिनाखँ मुंज्याय् थी थी देसय् च्वनादीपिं ४४ म्ह कवि कवयित्रीपिन्सं थःपिनि चिनाखँ ब्वनादी । मुंज्याय् ब्वनीगु चिनाखँयात थी थी भासं भाय् हीकाः चिनाखँमुना पिथनेगु ग्वसाः दुगु खँ नं वय्कलं कनादिल ।
वर्ल्ड नेवाः अर्गनाइजेशनया इनापय् दँपत्तिं मार्च लाया लिपांगु सनिबारखुन्हु हलिं नेवाः न्हिकथं हनेगु यानाच्वंगु जुल । थ्वखुन्हु वर्ल्ड नेवाः अर्गनाइजेशया लिसें थी थी देसय् दुगु नेवाः खलः पुचलं थी थी ज्याझ्वःया ग्वसाः ग्वयेगु यानाच्वंगु दु ।
