कसाः मिसा पुचःया ग्वसलय् झोल साब्वं दय्केगु व चीचीधंगु लाकांया कि रिङ्ग दय्केगु तालिम नेसं ११४३ बछलागा सप्तमि २०८० साल वैशाख २९ गते शुक्रवाः याःगु दु । थुगु ज्याझ्वलय् निइन्याम्ह मिसापिन्सं न्ह्यइपुक ब्वति कयादीगु खः । थौं कन्हय्या ईयात ध्यानय् तयाः हे थुकथंया झोल साब्वं दय्केगु तालिमया ज्या न्ह्याकेगु याःगु खः । न्हापा न्हापाथें भुतुलि मि च्याके म्वाःगु व थाकुक थलवल सिले माःगु ई मखुगुलिं ज्या यायत अःपुयमा धकाः थुकथंया तालिमया ज्या न्ह्याकूगु खः । थुगु तालिमय् झोल साब्व दय्का स्यनादीम्ह कसाः मिसा पुचःया दांभरिं रत्न कमल कंसाकार खः ।
थुुकथं हे ग्वसाः खलःपाखें निगूगु तालिम कि रिङ्ग भाजु केशर रत्न कसाःजुं दय्का स्यनादीगु खः । थु्कथंया तालिम बियागु मू आज्जु धैगु हे झी थःपिन्सं हे उत्पादन यानागु हलंज्वलं न्हियांन्हिथंया ज्याखँय् छ्यला वनेगु खः धकाः तालिमया ग्वसाः खलकं धाःगु दु । उदाय् समाजया संस्थागत दुजः तकं जुयाच्वनादीम्ह मय्जु रत्नकमल कंसाकारं मिसापिन्सं थःत माःगु शीप थःपिन्सं हे हासिल याना तय्माःगु खँयात ध्यानय् तयाः थुकथंया टेनिङ्ग ज्या जुयाच्वंगु खँ उदाय् सःयात कनादीगु दु ।
