ई कथं
-अञ्जना ताम्राकार
घ्वा:ना घ्वा:ना यंकिगु इया फसं
गबलें न्ह्यइपुक्क सर्गतय् गबलें धःलय्
वनेमा:ल्युल्यु यंकु यंकु थासय् इलं
गवसं मदु इया खिपः थःगु बसय्
भुतुमालिथें फय्या धा:नापं नाप
ब्वयकि सरररं गबलें थिकि थिकि पँपं
यंकी सात्तु साला: इया फसं मस्यु गनं गन
वनेमाः ल्युल्यु ब्वयाः इया मनसुवा कथं
गबलें यंकी इलं स्वाँनं जाःगु क्यबय्
गबलें यंकी वान्छ्वयेत कंझालय्
गबलें थथ्या: क्वथ्याः ग्वारा गिरा लँय्
गबबलें खुसि न्ह्याइ थें न्ह्या:का सलललं
लुइ नुगलय् छगू कथं जुइ मे मे कथं
मिखां खं थे मला: ल्हाती छःत्ति नं
इया: म्हिचां पित बीगु खर्च कथं
हनेमाः जीवन इलं धाःधाःकथं
गुम्हेस्यां नये खं लुँयाभुइ धर्ती पला तयवं
स्यापःस्यापां पं गुलिस्यां छःछा: नयेत तकं
छु स्वयाः याइगु खः मस्यु ल्याःचा: ई लं
सुयातं दु:खं सुयातं सुखं छाय्पीना बिगु इलं
साहित्यकार अञ्जना ताम्राकारया यादै यादमा(नेपाली कविता संग्रह), लुमन्तिया जः (नेपालभाषाया हाइकु मुनाः),ह्यूपा (नेपालभाषाया उपन्यास) व लुमन्तिया न्ह्याकं(( नेपालभाषाया चिनाखं मुनाः) प्रकाशित जुइधुकुंगु दु। ह्यूपा उपन्यासं नेपालभाषाया मिसा उपन्यासकारदथुइ जूगु उपन्यास धेधेबल्लाय् ल्यू सिरपा त्याकूगु खः। वय्कः नेपालभाषा मिसा साहित्यकार दबुया नकिं जुयादी।
