येँ – वरिष्ठ कलाकार गणेश साय्मियात जनस्तरं अभिनन्दन याःगु दु । नेपालभाषाया थी थी खलः पुचलय् च्वनाः सामाजिक ख्यलय् यानादीगु वय्कःया ज्वः मदुगु योगदानयात उच्च मूल्यांकन यानाः कलाकार राजेन्द्र शाक्यया संयोजकत्वय् नीस्वंगु ५५ म्ह दुजः दुगु समितिं थाैं सनिबार सुथय् ग्वसाः ग्वःगु हना ज्याझ्वलय् कलाकार साय्मियात अभिनन्दन याःगु खः ।
ज्याझ्वलय् वय्कःयात जनकवि दुर्गालाल श्रेष्ठं हनापौलिसें पलिगां न्ययेकाः हंगु व समितिं छगू लख व न्हय्न्याद्वः दां नं लःल्हाःगु खः ।
नेपालभाषा एकेदेमिया न्वकू मल्ल के. सुन्दर, हना समितिया नायः राजेन्द्र मान शाक्य, ख्यालि जुजु मदनकृष्ण श्रेष्ठ, वरिष्ठ संगीतकार अमर राज शर्मा राजोपाध्याय, वडा ल्याः १७ या नायः नवीन मानन्धर लिसेंया ब्यक्तित्वपिन्सं कलाकार साय्मिया व्यक्तित्व व योगदानया खँय् कुलादीगु खः ।
कलाकार साय्मिं थःगु नुगःखँ तयेगु झ्वलय् थःम्हं तच्वकं गौरबया महसुस यानागु खँ तयाद्यूगु खः । ज्याझ्वलय् नेपालभाषा ख्यःया थी थी संघसंस्थां नं वय्कःयात हनापौया लिसें हनेगु ज्या याःगु खःसा ज्याझ्वलय् वरिष्ठ मेहालामि भृगुराम श्रेष्ठ, उद्योगपति नारायणदास मानन्धर, डा. चुन्दा बज्राचार्य, व समितिया दुजःपिं लिसें मेमेपिं ब्यक्तित्वपिं झायादीगु खः । ज्याझ्वलय् लोककवि राजभाइ जकःमिं कलाकार सायमिया बारेय् च्वयादीगु कविता वाचन यानादीगु खः।
वि.सं. २०२२ सालय् जूगु भाषा आन्दोलनय् सक्रिय जुयादीम्ह गणेश साय्मिं तःगू हे दबूप्याखं व प्रहसनत निर्देशन यानादीगु दुसा २०३३ सालय् ख्यालि जुजु मदन कृष्ण श्रेष्ठ, रामशेखर नकःमि, श्रीकृष्ण अणुपिं दुथ्याःगु ‘मुनासः’ नांगु कलाकारतय् संस्थाय् दुथ्यानाः निर्दलीय पञ्चायती ब्यवस्थाया विरुद्ध राजनैतिक चेतना थनेगु, प्रजातन्त्रया पक्षय् सः ल्ह्वनाः न्ह्यइपुगु ज्याझ्वः न्ह्यब्वयेगु क्षमता दुम्ह कलाकारया कथं थःत धस्वाका दीगु दु । वय्कः नेपालभाषा मंकाः खलःया नीस्वना दांभरिं नं खः ।
