यल – यलय् अनला (पुरुषोत्तम ला) ज्वःछि श्री पुरुषोत्तम महात्म्यया बाखं कनीगु व भजनकीर्तनया ज्याझ्वः जुइगु जूगु दु । जोशी समाज केन्द्रीय ज्यासना पुचःया ग्वसालय् थ्व हे नेपाल संवत् ११४३ अनलाथ्वः पारु, मंगलबार (श्रावन २ गते) निसें अनलागाः आमै, बुधबार (श्रावन ३१ गते)तक न्हिथं न्हिनसिया ३ ताः इलंनिसें ५ ताः ईतक श्री पुरुषोत्तम महात्म्यया बाखं कनेगु व भजनकीर्तनया ज्याझ्वः जुइत्यंगु खः ।
ज्याझ्वः महामृत्युञ्जयघाट, शंखमुलय् च्वंगु जोशी समाजया छेँय् जुइगु धकाः समाजं धाःगु दु। थुकिया तयारिकथं वंगु सनिबार समाजं सुचुकुचु ज्याझ्वः याःगु दु ।
स्वदँय् छक्वः वइगु अनला थुगुसी वइगु अनलाथ्वः पारु, मंगलबार (श्रावण २ गते) निसें अनलागाः आमै, बुधबार (श्रावण ३१ गते)तक लाःगु दु । अनलाय् अप्वः धया थें पुरुषोत्तम मास महात्म्य पाठ व अब्सं च्वनेगु याइ ।
अनलाय् दक्व कथंया भिंज्या व भिंगु साइतया ज्या यायेत पनातःगु धकाः भाःपी । अय्सां न्हिथंया पुजापाठ यायेत धाःसा गुगुं नं नियमं पनातःगु मदु ।
