येँ – येँया पचलि भैरबया १२ दँया जात्रा, खड्गसिद्धि जात्रा थुगु दँय् लाःगु दु । पचलि भैरबया जात्रा दँय् दँसं कौलाथ्वः पन्चमिखुन्हु लाइ धाःसा १२ दँय् खड्गसिद्धि यानाः थप जात्रा हनेगु याइ । १२ दँया खड्गसिद्धि जात्राया निंतिं बसुबारखुन्हु सुथय् ग्वय्दां छायाः सुरुया विधि पूवंकूगु दु । जात्राया निंतिं दिल्लागाः एकादसि (कामिका एकादसि)खुन्हु हनुमानध्वाखाय् दुगु राजखड्गय् ग्वय्दां छायेगु परम्परा दु ।
राजखड्गय् ग्वय्दां छायेत बसुबार सुथय् ज्याबहालय् च्वंगु द्यःछेँय् गुथियार, स्थानिय प्रतिनिधि, भक्तजनपिनि लिसें मेमेपिं मुनाः बाजंनापं हनुमान ध्वाखाय् वंगु खः ।
खड्ग सिद्धि जात्राय् जुजु दुबलय् तक जुजुं पचलि भैरबलिसे खड्ग हिलेगु चलन दुगु खः । थुकिं यानाः जुजुया शक्ति अप्वया वनी धकाः धायेगु याः । तर नेपालय् गणतन्त्रात्मक देय् जुइधुंकाः ने.सं. ११३१ (वि.सं. २०६८) सालया १२ दँया खड्गसिद्धि जात्राय् छुमां कथं जक खड्ग ह्यूगु खः । थुगुसी नं थथे हे यानाः जात्रा क्वचायेकेगु धकाः गुरु व खड्ग जात्रा समितिया छ्यान्जे भरत मालिं धयादिल ।
वइगु कौलाथ्वः पन्चमि, बसुबार (कार्तिक २ गते)खुन्हु पचलि भैरबया दँय् दँसं जुइगु नियमित जात्रा जुइ धाःसा कौलाथ्वः दसमि, मंगलबार (कार्तिक ७ गते) चालंखुन्हु खड्ग सिद्धि जात्रा जुइ । धा
धार्मिक मान्यताकथं भैरब देय्या रक्षक खः । उकिं भैरबयात देय्या रक्षाया निंतिं क्षेत्रपालया कथं तयेगु याइ । लिच्छवि जुजु गुणकाम देवं नं कान्तिपुर नगर दयेकूबलय् देय्या रक्षाया निंतिं अष्टमात्रिकानापं कान्तिपुर नगरया दक्षिण लागाय् (आःया तेकु) क्षेत्रपालया कथं पचलि भैरबयात पलिस्था याःगु थी थी बंशावलिइ न्ह्यथना तःगु दु ।
