येँ– यन्त्रकलाया निगूगु एनिमेशन संकिपा लाखेया निपुगु मे ‘जय जय लाखे’या छगू ज्याझ्वःदथुइ पितब्वज्या जूगु दु । बेलायतय् च्वनादीम्ह संयुक्त श्रेष्ठं च्वयाः, निर्देशन व एनिमेशन यानादीगु उगु मे वंगु सनिबार पितब्वज्या जूगु खः ।
येँ, चाःबहीया एफक्यूब सिनेमाय् जूगु ज्याझ्वलय् ‘जय जय लाखे’ मेया खय् भाय् व नेवाः भासं हालातःगु मेया भिडियो पितब्वज्या जूगु खः । खय् भाय् व नेवाःभासय् दुगु उगु म्यूजिक भिडियोया पितब्वज्या येँ महानगर पालिकाया उप-प्रमुख सुनिता डंगोल व ख्यालिजुजु मदनकृष्ण श्रेष्ठया उजंधुंकाः पितब्वज्या जूगु खः ।
ज्याझ्वलय् उप-प्रमुख डंगोलं एनिमेशन संकिपाया माध्यमं मस्त व ल्याय्म्ह पुस्तायात भाय् संस्कृतिया ज्ञान बी फैगु धकाः खँ कनादिसे महानगर पालिकां मस्तय्त बः बियाः दयेकीगु एनिमेशनया निंतिं चालु आर्थिक दँय् १ करोड दां बजेटय् विनियोजन यानागु खँ कनादिल ।
ज्याझ्वलय् नेपालभाषा एकेदमिया उपकुलपति मल्ल के. सुन्दर, ख्यालिजुजु मदनकृष्ण श्रेष्ठ, व वरिष्ठ कलाकार मदनदास श्रेष्ठपिन्सं संकिपा लाखेपाखें संस्कृति व भाय् प्रवर्द्धनया निंतिं न्ह्यथने बहःगु भूमिका म्हितीगु धकाः खँ तयादिल ।
अथे हे ज्याझ्वलय् निर्देशक, च्वमि व एनिमेटर संयुक्त श्रेष्ठं थःपिनि पुचलं ६, ७ लाया मेहनतं ७ गू मिनेटया उगु मेया एनिमेशन दयेके फुगु खँ कनादिसे एनिमेशन तसकं जटिल विधा जूगु धकाः खँ तयादिल । ज्याझ्वलय् लाखे संकिपाय् दुथ्याःपिं मे हालामिपिं सतिश महर्जनङ निशा देशार, सत्यनारायण मानन्धरपिन्त मतिनाया चिं लःल्हायेगु ज्या जूगु व संकिपाय् सः बियादीपिं कलाकारतय्त प्रशंसापत्र लःल्हाःगु खः । ज्याझ्वलय् लाखे संकिपाया निर्मातापिं अन्जना श्रेष्ठ, समीर महर्जन अले एनिमेटर संयुक्त श्रेष्ठलिसें मेमेपिं मनूतय्सं ब्वति कयादीगु खः । संयुक्त श्रेष्ठया नेतृत्वय् दुगु यन्त्रकलां ७ दँ न्ह्यः नेपाःया न्हापांगु एनिमेशन संकिपा लिजेन्ड अफ शंखधर साख्वाः दयेकूगु खः ।
