येँ– न्यूजनेपाः डटकमं नेवाः न्ह्यलुवाः पत्रकार मल्ल के. सुन्दरयात हंगु दु । न्यूजनेपाः डटकमया म्हसीका बीत म्हिगः येँय् ग्वसाः ग्वःगु ज्याझ्वलय् बागमति प्रदेशया संस्कृति, पर्यटन व सहकारि मन्त्री पुकार महर्जनं वय्कःयात हनापौया लिसें पलिगां न्ययेकाः हंगु खः ।
ने.सं. १०८६ दं पत्रकारिता न्ह्याकादीम्ह वय्कः राष्ट्रिय समाचार समितिया पुलांम्ह प्रमुख अले इनाप वाःपौया सम्पादक व प्रकाशक मल्लयात पत्रकारिता ख्यलय् वय्कलं यानादीगु ज्यायात लुमंकाः न्यूजनेपालं हंगु खः । वय्कःयात लःल्हाःगु हनापौ न्यूजनेपाः डटकमया नेपालभाषा सम्पादक पौभाः साय्मिं ब्वनाः न्यंकादीगु खः ।
ज्याझ्वलय् मन्त्री महर्जन व बागमति प्रदेशया सांसद हरिप्रभा खड्गि श्रेष्ठं समुदायया हित जुइगु गुगुं नं ज्याया निंतिं थःपिनिगु ग्वाहालि दयाच्वनी धकाः प्रतिबद्धता प्वंकादीगु खः ।
अथे हे ज्याझ्वलय् हनेज्या जूम्ह मल्ल के. सुन्दरं पत्रकारिता ख्यःया थौंकन्हय्या हाथ्यायात चीकाः न्यूजनेपाः डटकम न्ह्याः वनेमाः धकाः बिचाः प्वंकादिल ।
वरिष्ठ पत्रकारपिं पुष्कर माथेमा व सुरेश किरण मानन्धरं थौंकन्हय् पत्रकारिता ख्यलय् न्हून्हूगु हाथ्या खने दयाच्वंगु धकाः उकियात चीकाः न्ह्याः वनेमाःगु खँय् बः बियादिल ।
अथे हे ज्याझ्वलय् न्यूजनेपाः डटकमया प्रबन्ध निर्देशक सिजन श्रेष्ठ, प्रकाशक बिगेन तुलाधर व सम्पादक शर्मिला सिल्भिया राजाेपाध्याय, कानूनी सल्लाहकार राजन के.सी.पिन्सं न्यूजपोर्टलया खँय् जानकारी बियादीगु खः ।
ज्याझ्वलय् लोककवि राजभाइ जकःमिं चिनाखँ ब्वनाः न्यंकादीगु खःसा ज्याझ्वः न्यूजनेपाः डटकमया संवाददाता न्ह्याकादीगु खः ।
ज्याझ्वलय् न्ह्यलुवाः व्यक्तित्व डा. महेशमान श्रेष्ठ, गुथि संस्थानया प्रमुख प्रशासक किरण शाक्य, राष्ट्रिय भूमि आयोग, येँया प्रमुख श्यामकृष्ण प्रजापति, संस्कृतिविद् डा. चुन्दा बज्राचार्य, प्रा. प्रेमशान्ति तुलाधरपिं लिसेंया मनूतय्सं ब्वति कयादीगु खः ।
खय् भाय्, नेवाःभाय् व अंग्रेजि भाय्या माध्यमं समाचार पितबीगु ता तयाः न्ह्याःगु न्यूजनेपाःया अमेरिकाया निंतिं प्रतिनिधि जयम्बु रन्जित, डेनमार्कया निंतिं शशि श्रेष्ठ, जर्मनया निंतिं कुमार नापित, दुबइया निंतिं कुमार लामा व बीरेन्द्र नकःमि, अले नेपाःया निंतिं रमेश मुनिकार जुयादी ।
थ्वहे ज्याझ्वलय् न्यूजनेपाः डटकमया प्रबन्ध निर्देशक सिजन श्रेष्ठं अमेेरिकां ज्वनाझागु हनापाै माष्टर अच्युतानन्द- श्रीलक्ष्मी मेमोरियल ट्रस्टया अध्यक्ष व संयोजक सजनी राजोपाध्याय्यात लःल्हागु खः। वय्कयात मन्त्री पुकार महर्जनं हनापाै लःल्हानादीगु खः।
