भाषा म्वाःसा जाति म्वाइ धकाः भाय्यात बः बिसें भाषा व साहित्यय् जागरण हयादीम्ह नेपालभाषा साहित्यया महाकवि सिद्धिदास महाजुया १५६ बुदिंया झ्वलय् हलिं नेवाः दबूलिं महाकवि सिद्धिदासया कृति विषयक खँल्हाबल्हा मुँज्या याःगु दु । दबुलिं यंलागाः द्वितिया खुन्हु जूम प्रविधिपाखें खँल्हाबल्हा मुँज्या याःगु खः।
ज्याझ्वः लोककवि राजभाइ जकःमिं सिद्धिदासया किपा न्ह्यःने त्वाःदेवाय् मत च्याकाः शुभारम्भ यानादीगु खः ।
खँल्हाबल्हा मुँज्याय् प्रा. प्रेम शन्ति तुलाधरं सिद्धिदासया छगू मूवंगु खण्डकाब्य सफू सत्यसतीबारे दुग्यंक खँ कनादीगु खः । सत्यसती सफू सिद्धिदासया छगू मास्टरपिस खः धासे वय्कलं थ्व सफू थौंया परिपेक्षय् नं उलि हे महत्वं जायाच्वंगु छम्ह विधवा मिसाया बांलाःगु चरित्र न्ह्यब्वयाःतःगु कृति खः धयादिल ।
अथेहे उप प्राध्यापक जीवन कुमार महर्जनं सिद्धिदासया मेगु छगू ज्वःमदुगु सफू सज्जन हृदयाभरणया खण्डकाब्यया बारे नुगःया खँ प्वंकादीगु खः । वय्कलं सज्जन हृदयाभरण खण्डकाव्यय् महाकविं थःम्हं फयेमाःगु आर्थिक अभाव, परिवार पाखें फयेमाःगु पीडा वोध थ्व सफुतिइ मचायेक ब्वयातःगु दु धयादिल ।
अथे हे लोककवि राजभाइ जकःमिं महाकविया आःतक पिहांवःगु कृतिया परिचय बिसें वय्कलं सिद्धिदास महाजुं च्वयादीगु न्यापु चिनाखँ नं न्यंकादीगु खः ।
ज्याझ्वःलय् हलिं नेवाः दबूया नायः संयुक्त श्रेष्ठं सिद्धिदासजुया कृतियात कयाः जूगु थ्व खँल्हाबल्हा अतिकं मूवंगु ज्याझ्वः जूगु खँ न्ह्यथसे सकसित सुभाय् देछाना दिल ।
ज्याझ्वः हलिं नेवाः दबूया मूदुजः नरेश शाक्यं न्ह्याकादीगु खः।
नेस ९८७ दँया यंलागा दुतिया खुन्हु येँया केलत्वालय् जन्म जुयादीम्ह सिद्धिदास महाजुया सज्जन हृदयाभरण नांजाःगु सफू खःसाः थुगु सफु सन् १९२०य् भारतया बेतिया पिहाँवगु खः। वय्कलं ४४ गुलिइ मल्याकं सफु च्वयादिगु दु। रामायणयात अनुवाद याना वयकलं सन १९१३य् सिद्धि रामायणयात लसय् हनादीगु खः । वय्कया लुमन्तिइ नेपाल सरकारंया हुलाक सेवा विभागं सन १९८० वयकया किपा दुगु टिकट पिथगु दुसाः वय्कया नामय् येँ महानगरपालिकां सिद्धिदास मार्ग नां तःगु दु। अथे हे हेटौडा, भोटाहितिइ झवाता तःगु दु।
