म्हिगः ने.सं. ११४४ गुंलागाः चौथि, सुक्रबारखुन्हु नेवाः साधना कला केन्द्रपाखें दयेकूगु ‘नुगःदुने सुचुके धुन…’ म्यूजिक भिडियो येँय् छगू बःचाधंगु ज्याझ्वःया दथुइ नांजाःम्ह निर्देशक पवन जोशीया ल्हातं पितब्वज्या जुल ।
बागमति भाइया च्वसाय् थुगु म्यूजिक भिडियोया निर्देशन पवन जोशी, सः गोविन्द ह्यूमत व दिपा महर्जन, लय गोविन्द ह्यूमत, प्याखंम्वः सुरज नापित व लीला जोशी, समाः मीरा डंगोल अले क्यामरा व सम्पादन सोहन मानन्धरपिन्सं यानादीगु खः । ज्याझ्वःया मूपाहां पवन जोशी अले पाहांपिं विजय रत्न असंबरे व पौभाः साय्मि खःसा ज्याझ्वः नेवाः साधना कला केन्द्रया नायः सुन्दर मान श्रेष्ठ (बागमति भाइ)या नायःसुइ न्ह्याःगु खः ।
ज्याझ्वलय् म्यूजिक भिडियोय् दुथ्याना दीपि व ग्वाहालि यानादीपिन्त मेडल, व दसिपौ लःल्हागु खःसा म्यूजिक भिडियोया निर्देशक पवन जोशीयात दसिपौ, मेडल व मतिनाया चिं लःल्हाःगु खः । ज्याझ्वलय् विजय रत्न असंबरे, गोविन्द ह्यूमतपिन्सं म्यूजिक भिडियोयात कयाः थःथःपिनि बिचाः प्वंकादीगु खःसा झी सकसिनं नेवाःमांयात लुमंकाः नेवाः नुगलं भय्बियाः फचिंफत्तले नेवाः भासं हे मे हालेमाःगु तर झीसं खय् भासं नं सुं स्वयां म्ह्व मजुइक तःजिक पलाः छीफु धकाः क्यनेभनं खय्भासं नं ज्या यायेमाःगु खँयात लुमंकाः संगीतया महत्वयात कयाः कुलादीगु अले नेवाः साधना कला केन्द्रया ज्याखँयात लुमंका दीगु खः ।
लिपतय् नायः भाजु सुन्दर मान श्रेष्ठ (बागमति भाइ)पाखें थुगु म्यूजिक भिडियो पिथने फुगुली लसता प्वंकादिसे ग्वाहालि यानादीपिं सकसितं सुभाय् द्यछाया द्यूगु खः ।
