येँ । सर्वोच्च अदालतं मुख्य व सहायक खुसिइ न्हापा क्वःछिनातःगु, जवंखवं न्यूनत्तम २० मिटरय् मेगु तँसा २० मिटर तनाः ४० मिटरतक गुगुं संरचना दयेके मदइगु मापदण्ड क्वःज्यूगु फैसला यायेधुंकाः अभियानकर्तात व सरोकारवालातय्सं उपत्यकाब्यापी सडक गैर न्यायिक खोला मापदण्ड संघर्ष समिति दयेकूगु दु । राष्ट्रिय मुक्ति क्रान्तिया नेता व उपत्यकाब्यापी सडक विस्तार पीडित संघर्ष समितिया नायः साय्मिया कजिसुइ थौं ५१ म्ह दुजः दुगु संघर्ष समिति दयेकूगु दु ।
आःया मुंज्यां सशक्त आन्दोलनया निंतिं तयारी यायेगु धकाः उकी दुथ्याःपिं अभियानकर्तां धाःगु दु । जनताया नीजि सम्पतिइ बन्देज तयेगु, थनाछ्वयेगु सडक मापदण्ड व खुसि सिथया मापदण्ड खारेज जुइमाःगु धयागु उमिगु मांग खः । ज्याझ्वलय् न्ववायेगुया झ्वलय् वक्तातसें– गुबलें सडक मापदण्ड सा गुबलें खुसि मापदण्ड हयाः मूलबासी नेवाःतय्त विस्थापित यायेत्यंगु धकाः थुकिं विद्रोहया पुसा पीगु धकाः धयादिल । संयोजक साय्मिं सरकारया थुगु निर्णययात लित कायेकेत आन्दोलनया लँपुं चेतावनी बीमाः धकाः धयादिल । साय्मिं कानून जनताया हितया निंतिं जुइमाःगु धयादिसे जनहितया अःखः जूवंगु सरकारया निर्णय विरुद्ध वंगु १० दँ न्ह्यवंनिसें सडक विस्तार विरुद्ध आन्दोलन जुयाच्वंगु धकाः धयादिल ।
