गुंला पर्व नजिकै आइपुगेकाले न्यत तुलाधर गुंलाबाजं उपसमितिबाट ने.सं. ११४५ दिल्लागाः पञ्चमी, मंगलबार (२०८२ असार ३१ गते)का दिन ताहाःननि नासःद्य समक्ष नासः पुजा गर्ने कार्य भएको छ ।
न्यत तुलाधरका सदस्यहरु जम्मा भई यस प्रकारले पूजा गर्ने कार्य भएको हो भने नासः द्यःको स्थानमा नै रहेर धाःबाजा र नाय्खिं बाजा बजाएर द्यः ल्हाये (देव आराधना) पनि गरिएको छ । ‘द्यः ल्हाये’सकिए पछि पूजा पछि ताहाःननिमा नै बसेर धाःबाजा र नाय्खिं बाजा पनि बजाउने कार्य गरिएको छ । ताहाःननिमा गुंलाबाजा बजाउन सकिएपछि त्यहीँदेखि बाजा बजाएर इतुंबहाःको लकाननि (ताराननि) भई इतुंबहालमा आएर त्यहाँबाट फेरि यतखामा पुगेको हो ।
यहाँबाट फेरि न्यत पुगेर तुंछेँ गल्लीमा गएर त्यहाँबाट न्यत तुलाधरहरुको त्वाःछेँ बुरांखेलमा गएर समय् (खाजा / चमेना) ख्वाउने काम भएको छ । यसरी बाटोभरि बाजा बजाउने क्रममा नयाँ र पुरानाहरुले बाजा बजाउने गरिएको छ । वाद्यवादनको क्षेत्रमा नासःद्य समक्ष निकै आस्था राखी भावभक्तिपूर्वक पूजा गर्ने नेवार परम्परा रही आएको छ ।
यसरी नासःद्यः समक्ष भावभक्ति राखिएमा वाद्य वादनमा हिसीले भरिपूर्ण भई सिद्धि प्राप्त हुन्छ भन्ने जनविश्वास रही आएको पाइन्छ । स्मरणीय छ, ने.सं ११४५ दिल्लाथ्वः खस्थि, मंगलबार (२०८२ असार २७ गते)देखि गुंलाबाजा सिकाउने कार्य शुरु गरिएको छ । न्यत तुलाधरका परिवारका छोराछोरी लगायतलाई बाज सिकाइएको छ ।
