कीर्तिपुरस्थित त्रिवि क्रिकेट रङ्गशालामा जारी आईसीसी क्रिकेट विश्वकप लिग–२ शृङ्खलाअन्तर्गतको खेलमा स्कटल्यान्डले नेपालसामु जितका लागि १९५ रनको चुनौती पेस गरेको छ ।
टस जितेर पहिले ब्याटिङ रोजेको स्कटल्यान्ड ३९ ओभर १ बलमा १९४ रन जोड्दै अलआउट भयो ।
स्कटल्यान्डका लागि ब्रान्डन म्याकमुलेनले ७३ र माइकल इङ्ग्लिशले ५१ रनको योगदान दिए पनि नेपाली बलरहरूको धारिलो आक्रमणसामु अन्य ब्याटर क्रिजमा टिक्न सकेनन् ।
नेपालका तर्फबाट ललित राजवंशीले घातक बलिङ गर्दै ४ विकेट लिए भने सन्दीप लामिछानेले ३ विकेट चट्काए ।
यसै खेलमार्फत २५ वर्षीय लेग स्पिनर सन्दीप लामिछानेले एकदिवसीय अन्तर्राष्ट्रिय क्रिकेटमा ऐतिहासिक विश्व कीर्तिमान समेत कायम गरेका छन् ।
उनी एकदिवसीय क्रिकेट इतिहासमै सबैभन्दा छिटो १५० विकेट लिने विश्वकै पहिलो खेलाडी बनेका छन् ।
घरेलु मैदानमा जारी शृङ्खलाको पहिलो खेलमा स्कटल्यान्डसँग पराजित भएको र दोस्रो खेलमा अमेरिकालाई पाखा लगाएको नेपालका लागि लिग–२ को अङ्क तालिकामा सुधार गर्न यो जित अपरिहार्य छ ।
हाल ८ देश सम्मिलित लिग–२ को तालिकामा नेपाल २६ खेलबाट २० अङ्कका साथ सातौँ स्थानमा सङ्घर्ष गरिरहेको छ ।
अर्कोतर्फ, पराजित हुनुअघि शीर्ष स्थान सुरक्षित गर्न खोजेको स्कटल्यान्ड ३० खेलमा ३८ अङ्कसहित पहिलो र अमेरिका २६ खेलमा ३६ अङ्कसहित दोस्रो स्थानमा छन् ।
