विभिन्न स्थानमा गएको पहिरोका कारण अवरुद्ध भएको मुग्लिन–नारायणगढ सडकखण्ड पुनः दुईतर्फी सञ्चालनमा आएको छ।
सडकखण्डको तुइनखोला, केराबारी र जलबीरे क्षेत्रमा खसेको पहिरो डोजर तथा अन्य उपकरणको सहायताले हटाइएपछि मंगलबार बिहानदेखि दुवैतर्फ सवारीसाधन सञ्चालनमा आएको हो।
सडक डिभिजन कार्यालय भरतपुरका अनुसार बिहानैदेखि पहिरो पन्छाउने कार्य तीव्र रूपमा सञ्चालन गरिएकाले सडक पूर्ण रूपमा खुलाउन सफल भएको हो।
लगातारको वर्षासँगै सोमबार साँझ विभिन्न स्थानमा पहिरो खस्ने जोखिम बढेपछि जिल्ला प्रशासन कार्यालय चितवनले सुरक्षा सतर्कताका लागि सडकमा सवारी सञ्चालन अस्थायी रूपमा रोकेको थियो।
सडक सञ्चालनमा आए पनि रातिदेखि रोकिएका सवारीसाधन एकैपटक गुड्न थालेकाले सडकमा अझै सवारीको चाप उच्च रहेको जनाइएको छ।
सम्बन्धित निकायले यात्रु तथा चालकलाई वर्षायाममा यात्रा गर्दा विशेष सावधानी अपनाउन, मौसमको अवस्था तथा सडकको जानकारी लिएर मात्र यात्रा गर्न र सम्भावित पहिरोको जोखिमप्रति सचेत रहन आग्रह गरेको छ।
