ज्ञानमाला मेहालामि पुचःया ग्वसालय् म्हिगः ने.सं. ११४६ थिंलाथ्वः दुतिया, सनिबार (२०८२ मंसीर ६ गते)खुन्हु धापाख्यः बुद्ध बिहारय् जूगु छगू ज्याझ्वःया दथुइ ‘जय जय पुकार यायेनु पासापिं ….’ नेपालभाषा ज्ञानमाला भजन म्यूजिक भिडियोया पितब्वज्या जूगु दु ।
धापाख्यः ज्ञानमाला भजन मेहालामि पुचःया छ्यान्जे केशव महर्जनया ब्यवस्थापन व भाजु हर्षलाल महर्जनया नायःसुइ जूगु थुगु ज्याझ्वलय् मूपाहांकथं यल महानगरपालिकाया उपमेयर मय्जु मञ्जली शाक्ययात ब्वनातःगु खःसा विशिष्त पाहांकथं ललितपुर महानगर पालिका वडा २३ या वडानायः भाजु जीवन महर्जन, निर्देशक, कलाकार व मेच्वमि पवन जोशी, नेपालभाषाया भाषाविद् पौभाः साय्मिपिं झायादीगु खः।
नरेश महर्जनं न्ह्याकादीगु थुगु ज्याझ्वलय् देवरत्न महर्जनं लसकुस न्वचूया झ्वलय् थुगु यइपुगु त्तानमाला भजन मेया सवाः, बुद्धज्ञान व थुंदीगु खँग्वःया ल्यज्यायात कयाः थःगु नुगःखँ प्वकादिल । पितब्वज्या जूगु मेयात कयाः वडानायः जीवन महर्जन व कलाकार निर्देशक पवन जोशिं थःपिनि नुगःखँ तयादीगु खः । लिसें पौभाः साय्मिं बुद्धधर्म व नेपालभाषा ला व लुसि थें सत्तीक स्वापू दुगु व नित्तां थःथवय् पूरक खः धकाः न्ह्यथना दिसे थुगु मेया माध्यमं झी सकसिया नुगलय् बुद्ध लुइमा अले नेवाः नुगलं जायेमा धकाः नुगःखँ तयादीगु खः ।
थुगु मेया च्वमि व संगीत मदुम्ह कृष्ण महर्जन खःसा शब्द संकलक व सम्पादक केशव महर्जन, संगीत संयोजक सुमन कपालि, भिडियो छायांकन व निर्देशक बाबुकाजि महर्जन खः । थुगु मेय् भाजु केशव महर्जनया लिसें ज्ञानमाला भजन मेहालामि पुचःया दुजःपिनि सः दुथ्याना च्वंगु दु । ज्याझ्वलय् विशेष पाहांपिन्त सुभाय् पौया लिसें भजन मेया कलाकःमिपिन्त दसिपौ लःल्हायेगु ज्या जूगु खः । थुगु मे संसार्स अनलाइन यूट्यूब च्यानलय् अपलोड जूगु दु ।
