नेवाः देय् दबूमा पहिलोपटक महिला नेतृत्व, रश्मिला प्रजापति अध्यक्ष निर्वाचित

नेवाः समुदायको अग्रणी संस्था नेवाः देय् दबू मा पहिलोपटक महिला नेतृत्व स्थापित भएको छ। राजधानीमा सम्पन्न आठौँ महाधिवेशनले लामो समयदेखि महिला अधिकार र आदिवासी जनजाति आन्दोलनमा सक्रिय रश्मिला प्रजापति लाई केन्द्रीय अध्यक्षमा चयन गर्दै संगठनको इतिहासमा नयाँ मोड ल्याएको हो।

यो चयन केवल नेतृत्व परिवर्तन मात्र नभई नेवाः समुदायभित्र लैङ्गिक समावेशिता र नेतृत्वको पुनर्संरचनातर्फको संकेतका रूपमा हेरिएको छ। तीन दशकदेखि भाषा, संस्कृति र सामुदायिक अधिकारका लागि सक्रिय देय् दबू अहिले देशका ६८ जिल्लामा फैलिएको सञ्जालसहित प्रभावशाली संगठनको रूपमा स्थापित भइसकेको छ।

झन्डै १५ वर्षदेखि संगठनमा आबद्ध प्रजापति यसअघि उपाध्यक्ष थिइन् र नेवाः मिसा दबूकी संस्थापक अध्यक्षका रूपमा महिला सशक्तीकरणमा केन्द्रित भूमिका खेलेकी थिइन्। उनको अध्यक्षीय यात्रालाई महिला नेतृत्व विकासको निरन्तर अभियानको उपलब्धि मानिएको छ।

नवनिर्वाचित अध्यक्ष प्रजापतिले अब संगठनलाई अझ प्रभावकारी र गतिशील बनाउने, संघीय संरचनाअनुसार तल्लो तहसम्म सक्रियता बढाउने तथा महिला सशक्तीकरणलाई समग्र समुदायको विकाससँग जोड्ने लक्ष्य अघि सारेकी छन्। साथै, उनले नेवाः समुदायको सामाजिक–आर्थिक उन्नति, नेपाल भाषा र सांस्कृतिक सम्पदाको संरक्षण तथा अन्तर्राष्ट्रिय पहिचान विस्तारमा ध्यान केन्द्रित गर्ने बताएकी छन्।

महाधिवेशनले अन्य पदाधिकारीहरू पनि चयन गरेको छ, जसले नयाँ कार्यसमितिमार्फत संगठनलाई थप सुदृढ बनाउने अपेक्षा गरिएको छ।

यस्तै वरिष्ठ उपाध्यक्षमा सत्यनारायण डंगोल, उपाध्यक्ष (महिला) सिता श्रेष्ठ, उपाध्यक्ष (कोशी प्रदेश) नरेशकुमार शाक्य, उपाध्यक्ष (मधेश प्रदेश) मा दक्षनारायण श्रेष्ठ, उपाध्यक्ष (वाग्मती प्रदेश) मा शान्त श्रेष्ठ, उपाध्यक्ष (गण्डकी प्रदेश) मा हरिकुमार श्रेष्ठ, उपाध्यक्ष (लुम्बिनी प्रदेश) मा बिजुला जोशी, उपाध्यक्ष (कर्णाली प्रदेश)मा खग्रेन्द्रबहादुर श्रेष्ठ, उपाध्यक्ष (सुदुरपश्चिम प्रदेश) मा ऋषिकेश श्रेष्ठ, र उपाध्यक्ष (काठमाडौं उपत्यका) मा उमेश स्थापित निर्वाचित रहेका छन्। महासचिव श्रीकृष्ण श्रेष्ठ र उपमहासचिवमा वाशु श्रेष्ठ रहेका छन् ।

खुल्ला सचिवहरू (निर्विरोध निर्वाचित):

• नारायण प्रसाद श्रेष्ठ

• श्रीजन श्रेष्ठ

सदस्यहरू (निर्विरोध निर्वाचित):

• भिमकला श्रेष्ठ (महिला, कोशी)

• राम भक्त प्रधान (खुल्ला, मधेश)

• पार्वती श्रेष्ठ (महिला, वाग्मती)