नेपाल खुला विश्वविद्यालयया व्यवस्थापन तथा कानून संकायया डीन पदय् प्रा.डा. अरहन स्थापित हालय् नियुक्त जुयादीगु दु । विदेशी विश्वविद्यालयतय्गु डीन नियुक्तिया स्तरीयकृत प्रक्रिया व पध्दति छ्यला: राष्ट्रीय दैनिकय् सार्वजनिक सुचं पिथना: खुला प्रतिस्तपर्धां वय्क: लिसें नेपाल खुला विश्वविद्यालयया स्वंगुलिं संकायया डीन ल्ययेगु नेपालय् थ्व न्हापां खुसिइ अभ्यास जूगु ख: ।
प्रा.डा. स्थापित ताःई न्ह्योनिसें उगु विश्वविद्यालयय् व्यवस्थापन विषयया प्राध्यापन याना वयाच्वनादीम्ह खः । व्यवस्थापन विषयलय् वयकःया तःगुमछि सफू नं पिदने धुंकूगु दु । वयकः नेपालभाषाया च्वमिया लिसें भाषिक कार्यकर्ताकथं नं म्हसीका दुम्ह व्यक्तित्व खः । नेपालभाषां वयकःया बाखं सफू व आपालं फुटकर रचनात नं पिहांवःगु दु । थ्वया न्ह्यो त्रिभुवन विश्वविद्यालयय् च्यादँ उप-प्राध्यापक जुया: प्राध्यापन यानादीम्ह थ:गु करिअरया शुरुइ बैकिंग ख्यलय् नं खुदँ ज्या यानादीगुया लिसें गोरखापत्र संस्थाया द राइजिंग नेपाल अंग्रेजी दैनिकय् वरिष्ठ सह-सम्पादक जुया: १५ दँ अंग्रेजी सम्पादन यानादीगुया अनुभव दुम्ह व्यक्तित्व खः । व्यवस्थापन विषयस च्यागू पाठ्यसफू व पेशागत सफूत च्वयादीधुंकूम्ह खः ।
हलिंयंकंया अनुसन्धानया सुचिकृत थी थी जर्नलय् वयकःया ७८पु अनुसन्धानया च्वसू पिदंगु दु । वयकःया नेपालभाषाय् थ्यंमथ्यं सच्छिपु, अंग्रेजी भाषाय् व्यवस्थापन, अर्थशास्त्र, संगीत व नेवा: संस्कृति विषयस यानाः १,७५० सिवें अप्पो च्वसु पिदंगु दु ।
