मिसा साहित्यकार मुनाया ग्वसालय् नेपालभाषा गुगल ट्रान्सलेशन ज्याझ्वःया उजेज्या जूगु दु । म्हिगः अनलागाः त्रयोदसि, सोमबार (जुलाइ ३१)खुन्हु प्रविधिया माध्यम जूमपाखें जूगु ज्याझ्वलय् नेपाःदुने लिसें नेपाःपिने च्वंपिं थी थी मनूतय्सं ब्वति काःगु खः ।
मिसा साहित्यकार मुनाया नकिं अन्जना ताम्राकारया मुंज्या नायःसुइ न्ह्याःगु ज्याझ्वलय् लुम्बिनी बौद्ध विश्वविद्यालयया डिन डा. माणिक रत्न शाक्य , वर्ल्ड नेवाः अर्गनाइजेशनं (WNO) या नायः संयुक्त श्रेष्ठ, पुलांम्ह नायः सिजन श्रेष्ठ, गुगल टीमया फोकल पर्सन उज्ज्वल राजभण्डारि, नेवाः मिसा दबूया नकिं कस्तुरी श्रेष्ठ, WNO नेपाः च्याप्टरया नायः सुरेन्द्र भक्त श्रेष्ठपिन्सं ब्वति कयादीगु खः ।
ज्याझ्वलय् नवानादीपिंपिन्सं गुगल ट्रान्सलेशनया महत्वयात कयाः थःथःपिनि नुगःखँ प्वंकादीगु खः । लुमंके बहःजू, थौंकन्हय् नेपालभाषायात गुगल ट्रान्सलेशन यायेगु ज्याखँय् WNO नं विशेष प्राथमिकता बियाः नेवाः ह्यःमि पौभाः साय्मिया नेतृत्वय् न्हिया न्हिथं हे गुगल ट्रान्सलेशन यायेगु ज्या जुयाच्वंगु व थुकियात WNO या फेसबुक पेजपाखें लाइभ यानाः गुगल ट्रान्सलेशनया महत्वयात सामाजिक सन्जालपाखें ध्वाथुइकेगु ज्याय् जुयाच्वंगु दु ।
अथे हे अमेरिकाय् नरेश शाक्यपिनि नेतृत्वय् व नेपालय् शाक्य सुरेनया पहलय् नं थुजाःगु हे गुगल ट्रान्सलेशन ज्याझ्वः न्ह्यानाच्वंगु दु । थ्व हे झ्वलय् मिसा साहित्यकार मुनाया नेतृत्वय् थुजाःगु हे गुगल ट्रान्सलेशन ज्याझ्वः आः न्ह्यायेत्यंगु खः ।
