येँ – थुगुसीया भिक्षु हिरा साहित्य सिरपा: वरिष्ठ च्वमि सुवर्ण मान तुलाधरयात लःल्हाःगु दु। उदाय् समाजया २० क्व:गु दँमुंज्याया झ्वलय् जूगु ज्याझ्वलय् भिक्षु हिरा साहित्य सिरपा: तुलाधरयात लःल्हाःगु खः।
दँय्दँसं बिया वयाच्वंगु थुगु सिरपाः न्यादँ न्ह्य: साहित्यकार केशरमान ताम्राकारं थ: मां हिरा देवी व अबु भिक्षु रत्नया नामं नीस्वनादीगु ख:।
आःतकया दुने पूर्ण काजी ताम्राकार, पुष्प रत्न तुलाधर , सुगत रत्न तुलाधर व हितकर वीर सिंह कंसाकारयात थुगु सिरपाः बीधुंकूगु दु।
थ्व हे दथुइ, भिक्षु हिरा फाउन्डेशनं याकनं हे नांजा:म्ह आख्यानकार मथुरा साय्मिया न्हूगु ताहाः बाखं सफू “चिप-निप” पिथनेत्यंगु खँ सीदुगु दु ।
