येँ– नेवाः देय् दबुलिं थःगु २९ क्वःगु पलिस्था दिवस हसें स्वंगू सिरपाः लःल्हाःगु दु । देय् दबूया कार्यबाहक नायः चन्द्रलाल राजभण्डारीया मुंज्या नायःसुइ येँया क्षत्रपाटीइ शुक्रबार जूगु ज्याझ्वलय् थुगुसीया नारायणदेवी-तीर्थ व्यवसायी प्रोत्साहन सिरपाः, नारायणदेवी तीर्थ नेवाः समाजसेवा सिरपाः व गिरिधरलाल नेपालभाषा सेवा सिरपाः लःल्हाःगु खः।
ज्याझ्वलय् नारायणदेवी-तीर्थ व्यवसायी प्रोत्साहन सिरपाः नेपालमण्डल टेलिभिजनयात, नारायणदेवी तीर्थ नेवाः समाजसेवा सिरपाः डा. महेशमान श्रेष्ठ व नेवाः समाज भरतपुर चितवनयात अले गिरिधरलाल नेपालभाषा सेवा सिरपाः नेपाल लिपि गुथि व प्रा. डा. प्रेमशान्ति तुलाधरयात लःल्हाःगु खः। वय्कःपिन्त देय् दबूया संरक्षक मल्ल के सुन्दर, कार्यबाहक नायः राजभण्डारी व दातापाखें डा. सुमित्रा मानन्धरं दसिपौलिसें पलिगां न्ययेकाः बेतालिं चिकाः हसें नगद राशी लःल्हानादीगु खः। ज्याझ्वलय् नेपालमण्डल टेलिभिजनपाखें प्रवन्ध निर्देशक प्रकाशकाजी डंगोल, नेपाल लिपि गुथिपाखें नायः अनिल स्थापितं सिरपा कयादीगु खः।
स्वंगुलिं सिरपाःया राशी छगू छगू लख तका खःसा नारायणदेवी तीर्थ नेवाः समाजसेवा सिरपाः व गिरिधरलाल नेपालभाषा सेवा सिरपाः निम्ह निम्हसित लाःगुलिइ ५० द्वः तकाया ल्याखं प्यम्हसित लःल्हाःगु खः।
थुपिं सिरपाः थः मांअबुया नामं डा. लोचन मानन्धर, प्रचन्ड मानन्धर, प्रकाश मानन्धर, डा. सुमित्रा मानन्धर, व मदुम्ह अनिता मानन्धरं नीस्वना दीगु खःसा थुपिं सिरपाः नेपाल सम्वत ११३२ निसें बिया वयाच्वंगु खः।
ज्याझ्वलय् मू पाहां उपप्रधान तथा गृहमन्त्री नारायणकाजी श्रेष्ठं स्वनिगःपिने ‘निनि’, ‘पाजु’, ‘अजि’ थे जाःगु सम्बोधन खँग्वः जक नेवाःभाय्या कथं ल्यनाच्वंगु खँ न्ह्यथँसें मां भाय्या संरक्षणयात कयाः बः बियादीगु खः।
ज्याझ्वलय् दबूया संरक्षक मल्ल के सुन्दरं दबुलिइ थगुने पलिस्था दिवस हनेगु झ्वलय् याःगु नेवाः भाय् ल्हायेगु व थःगु हे भवन दयेकेगु निगू प्रतिवद्धता लुमंकुसें नेवाः भाय् ल्हायेत याःगु प्रतिद्धतायात व्यवहारय् कार्यान्वयन यायेमाःगुली बः बियादिल।
ज्याझ्वलय् पूर्व मन्त्री राजेन्द्र प्रसाद श्रेष्ठ, हलिं नेवाः दबूया निर्वतमान नायः सिजन श्रेष्ठ, आदिवासी जनजाति उत्थान राष्ट्रिय प्रतिष्ठानया उपाध्यक्ष गोकुल घर्तीमगर, लोककवि राजभाइ जकःमि लगायतं नं देय् दबूया पलिस्था दिवसया झ्वलय् भिन्तुना द्यछाना दीगु खः।
ज्याझ्वलय् सिरपा निर्णायक समितिया कजि डा पुष्पराज राजकर्णिकारं सिरपा त्याकूपिनिगु नां घोषणा यानादीगु खसाः गिरिधरलाल नेपालभाषा सेवा सिरपाः त्याकादीम्ह प्रा. डा. प्रेमशान्ति तुलाधरं थःगु नुग खँ तयादीगु खसाः वय्कलं सिरपा कथं थःयात लःल्हागु ५० द्व तकाः देय् दबुयात अक्षय कोष नीस्वनेत लःल्हानादीगु खः।
ज्याझ्वलय् देय् दबूया जग्गा न्यायेत आर्थिक ग्वाहालि यानादीम्ह पंचवीर सिंह तुलाधरयात विशेष सम्मान नं याःगु खः । ज्याझ्वलय् हलिं नेवाः दबूया निर्वतमान नायः सिजन श्रेष्ठ, पूर्व सांसद दिव्यमणि राजभण्डारीपिन्सं देय् दबूयात आर्थिक ग्वाहालि लःल्हाना दीगु खः।
ज्याझ्वलय् कुमारी प्याखं, लाखे प्याखं न्ह्यब्वयेगु ज्या नं जूगु खः । देय्न्यंक च्वंपिं नेवाःतय्त छधी छप्पँ यायेगु आज्जुं २९ दँ न्ह्यः पलिस्था जूगु देय् दबू थुथाय् ६० गुलिं मल्याक जिल्लाय् न्यनेधुंकूगु दु ।
