येँ– येंया नखःया क्वःनेयाः व नेवाः न्ह्यलुवाःलिसें उपन्यासकार मल्ल के. सुन्दरया बुन्हि झाः लाकाः वय्कया न्हूगु उपन्यास कुमारीया पितब्वज्या जूगु दु। निरन्जन रत्न शाक्यया मूनायःसुइ म्हिगः यंलाथ्वः चतुर्दसि, बसुबारखुन्हु येँय् जूगु ज्याझ्वलय् न्याम्ह पुलांपिं कुमारी माजुपिं नानिमय्जु शाक्य, अमिता शाक्य, रश्मिला शाक्य, प्रिति शाक्य, मतिना शाक्यं मंकाःकथं कुमारी उपन्यासया पितब्वज्या याना बिज्याःगु खः।
सफूया प्रकाशक एड जोन प्रा.लिया कजि सुजीव बज्राचार्यं लसकुस यानाः न्ह्याःगु ज्याझ्वलय् गुरुजुपिं दशरत्न बज्राचार्य, भीमरत्न बज्राचार्य व दीपेन्द्र बज्राचार्यं स्वस्ति बाचन नं याना बिज्याःगु खः। ज्याझ्वलय् उपन्यासयात कयाः डा. ज्योति प्रभा तुलाधरं दुग्यंक कुलादीगु खःसा नेपालभाषा टाइम्सया सम्पादक सुरेश किरणं नं उपन्यासया खँय् थःगु नुगःखँ प्वंकादीगु दु।
ज्याझ्वलय् उपन्यास च्वमि मल्लं उपन्यास च्वयागु थी थी पृष्ठभूमिया लिसें कुमारीया थी थी पक्षयात कयाः न्ववाना दीगु खः। लिपतय् एड जोन प्रा.लिया पाखें सकसितं सुभाय् द्यछाया दीगु खः ।
कुमारी उपन्यास निरञ्जन रत्न शाक्य, सत्यनारायण डंगोल, मचाराजा महर्जनया आर्थिक ग्वाहालिं एड जोन प्रा.लिं याःगु खः।थ्वयां न्ह्यः नं उपन्यासकार मल्लया थी थी विषयबस्तुयात कःघानाः न्यागू उपन्यास पिदने धुंकूगु दु। वय्कःया ३० गुलिं मल्याकं कृति पिहांवयेधुंकुगु दु।
