काठमाडौँ । सर्वोच्च अदालतको आदेशसँगै नेकपा एमालेका अध्यक्ष केपी शर्मा ओली र पूर्वमन्त्री रमेश लेखक थुनामुक्त भएपछि एमाले कार्यकर्ताहरूले देशभर विजय जुलुस प्रदर्शन गरेका छन्।
काठमाडौँको माइतीघर, कलंकी, कोटेश्वर लगायतका मुख्य क्षेत्रहरूमा भेला भएका हजारौँ कार्यकर्ताहरूले पार्टीको झण्डा र अध्यक्ष ओलीको तस्बिर बोकेर खुसीयाली मनाएका हुन्।
सर्वोच्च अदालतले बन्दीप्रत्यक्षीकरणको रिटमाथि सुनुवाइ गर्दै उनीहरूलाई हिरासतमा राख्नु गैरकानुनी भएको ठहर गरेलगत्तै राजधानीसहित प्रमुख सहरहरूमा स्वतस्फूर्त रूपमा जुलुस निस्किएको थियो।
प्रदर्शनमा सहभागी एमाले नेता तथा कार्यकर्ताहरूले यस घटनालाई ‘न्यायको जित’ र ‘राजनीतिक प्रतिशोधको पराजय’ को रूपमा व्याख्या गरेका छन्।
उनीहरूले वर्तमान सरकारले शक्ति र सत्ताको दुरुपयोग गरी राजनीतिक दलका शीर्ष नेताहरूलाई सुनियोजित रूपमा फसाउन खोजेको आरोप समेत लगाएका छन्।
जुलुसमा सहभागीहरूले ‘न्यायप्रेमी जनताको जित भयो’, ‘राजनीतिक प्रतिशोध बन्द गर’ जस्ता नाराहरू लगाएका थिए।
अध्यक्ष ओलीको रिहाइले पार्टी कार्यकर्ताहरूमा नयाँ उत्साह थपेको र यसले मुलुकको लोकतान्त्रिक प्रणालीलाई थप बलियो बनाएको उनीहरूको दाबी छ।
काठमाडौँ मात्र नभई पोखरा, बुटवल, विराटनगर र चितवन जस्ता ठूला सहरहरूमा पनि एमालेका भ्रातृ संगठनहरूले विजय र्याली निकालेका छन्।
कतिपय स्थानमा कार्यकर्ताहरूले अबिर जात्रा गर्दै मिठाई समेत वितरण गरेका छन्।
एमाले नेतृत्वले यस फैसलालाई अदालतको गरिमा र निष्पक्षताको प्रमाणका रूपमा लिँदै अब पार्टी थप सशक्त ढंगले अगाडि बढ्ने जनाएको छ।
रिहाइपछि अध्यक्ष ओलीले आफ्नो निवास पुगेर संक्षिप्त प्रतिक्रिया दिँदै सत्यलाई जति दबाए पनि अन्ततः सत्यकै जित हुने बताउनुभएको छ।
यो घटनाले नेपाली राजनीतिमा नयाँ तरङ्ग पैदा गरेको छ र आगामी दिनमा सत्तापक्ष र प्रतिपक्षबीचको सम्बन्ध कसरी अगाडि बढ्छ भन्नेमा सबैको चासो केन्द्रित भएको छ।
