लमजुङ – हिउँदे वर्षाको निहुँमा मध्यपहाडी लोकमार्ग फेरि एकपटक ठप्प भएको छ।
मध्यनेपाल नगरपालिका–१०, विमिरे भञ्ज्याङमा गएरातिदेखि खसेको पहिरोले बिहानैदेखि यातायात पूर्ण रूपमा बन्द गराएको छ।
सामान्य वर्षा हुनासाथ सडक बन्द हुने नियतिले लमजुङवासीले लामो समयदेखि सास्ती खेप्दै आएका छन्।
जिल्ला प्रहरी कार्यालय लमजुङका सूचना अधिकारी ज्ञानेन्द्रबहादुर क्षेत्रीका अनुसार लगातारको वर्षाका कारण पहिरो पन्छाउने काम सुरु गर्नै सकिएको छैन।
त्यति मात्र होइन, सडक खण्डका विभिन्न खोलाहरूमा पानीको बहाव उच्च भएकाले यात्रुहरू जोखिम मोल्न बाध्य छन्।
सडक पूर्वाधारको दुरवस्था र मौसमको पूर्वतयारीमा देखिएको फितलोपनका कारण सर्वसाधारणले सास्ती भोग्नुपरेको छ।
वर्षा नरोकिएसम्म सडक तत्काल खुल्ने सम्भावना न्यून छ, जसले गर्दा सयौँ यात्रुहरू बाटोमै अलपत्र परेका छन्।
