काठमाडौं। भदौ १० गते रसुवाको भोटेकोशीमा आएको विनाशकारी बाढीमा परी ज्यान गुमाएकाहरूप्रति श्रद्धाञ्जली अर्पण गर्दै सरकारले आज सोमबार देशभर राष्ट्रिय शोक मनाउँदै छ।
घटनाको १३औँ दिनमा शोकसन्तप्त परिवारप्रति ऐक्यबद्धता जनाउन देशभरका सरकारी कार्यालयका साथै विदेशस्थित नेपाली दूतावास र नियोगहरूमा राष्ट्रिय झण्डा आधा झुकाउने निर्णय गरिएको गृह मन्त्रालयले जनाएको छ।
बाढीले पुर्याएको अपूरणीय क्षतिका कारण आज पनि हजारौँ नागरिक आफन्तको खोजी र प्रतीक्षामा छन् भने सयौँ परिवार घरबारविहीन भई अस्थायी आश्रयस्थलमा बस्न बाध्य छन्। यो दिन मृतकप्रति सम्मान व्यक्त गर्ने मात्र नभई बेपत्ताको खोजीलाई तीव्र बनाउने र प्रभावितको पुनर्स्थापना गर्ने राष्ट्रिय संकल्पको घडी पनि हो।
राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार बाढी प्रभावित क्षेत्रहरूबाट हालसम्म १३ हजार ३९९ जनाको उद्धार गरिएको छ। बाढीका कारण हालसम्म १ हजार ३४२ जनाको मानवीय क्षति भएको विवरण प्राप्त भए पनि ९८ जनाको मात्रै सनाखत भई परिवारले शव बुझेका छन्।
अझै पनि ४ हजार १९६ जना नागरिक सम्पर्कविहीन रहेका छन्, जसमा सर्वसाधारणका साथै सुरक्षाकर्मी, कर्मचारी र विदेशी नागरिकसमेत समावेश छन्। जिल्लागत विवरण अनुसार रसुवाबाट करिब १ हजार ८५७ र नुवाकोटबाट करिब २ हजार ३४० जना नेपाली नागरिक बेपत्ता छन्।
यसका साथै करिब १०० जना सुरक्षाकर्मी तथा कर्मचारी र ५९९ जना विदेशी नागरिक अझै सम्पर्कविहीन रहेको प्राधिकरणले जनाएको छ। भोटेकोशीले भत्काएका संरचना र पुर्याएको गहिरो चोटका कारण प्रभावित क्षेत्रको जनजीवन सामान्य अवस्थामा फर्किन अझै लामो समय लाग्ने देखिएको छ।
