यल– नेवाः भाय् सर्च इन्जिन गुगल ट्रान्सलेटय् दुथ्याःगु दु । थुकिं यानाः आः नेवाः भासं च्वयातःगु गुगुं नं खँपु, खँग्वः थी थी १०० स्वयां अप्वः भासं हीके ज्यूगू दु धाःसा मेमेगु भासं च्वयातःगु खँग्वः, खँपु नं नेवाः भासाय् हीके फैगु जूगु दु ।
म्हिगःनिसें गुगल ट्रान्सलेटय् नेवा भाय् दुथ्याःगु धकाः नेपालभाषा गुगल ट्रान्सलेट परियोजना न्ह्याका वयाच्वंगु वर्ल्ड नेवाः अर्गनाइजेशनं (डब्ल्यूएनओ) धाःगु दु । सन २०२१ निसें नेवाः भाय्यात गुगल ट्रान्सलेटय् दुथ्याकेगु निंतिं डब्ल्यूएनओ नं परियोजना न्ह्याकावं वयाच्वंगु खः ।
आः गुगल ट्रान्सलेशनया भाय् हीकेगु बटनय् नेपालभासा (नेवारी) च्वयातःगु दुसां थुगु ‘नेवारी’यात चीकाः ‘नेपालभासा’ जक तयेगुया निंतिं अन्तर्राष्ट्रिय मानकीकरण संगठन (आइएसओ)लिसे खँ ब्याकेगु प्रक्रिया न्ह्यानाच्वंगु धकाः अर्गनाइजेशनं धाःगु दु । परियोजनाखतं नेपाःया लिसें थी थी देसय् च्वंपिं थी थी पुचलं थ्यं मथ्यं स्वदँत्या दँ न्ह्यवंनिसें न्हिथं धया थें अंग्रेजी भाय्या खँपुत नेवाः भाय्लय् हीकेगु ज्या जुयाच्वंगु खः ।
गुगलं थ्वयां न्ह्यः अंग्रेजी, खस नेपाली, हिन्दीया लिसें १३३ गू भासय् हीकेगु सेवा बियाच्वंगु व आः नेवाः भाय्या लिसें मेमेगु ११० गू भाय् तनाब्यूगु खः । गुगलया कथं आः ब्याक्क २४३ गू भासं हीके फैगु जूगु दु ।
आर्टिफिसियल इन्टेलिजेन्स छ्यलाः थी थी भासं हीकेगु सुविधा हयागु धकाः गुगलं धाःगु दु ।
गुगलं सुरुइ अंग्रेजी, चीनिया, फ्रेन्च, जर्मन, जापानी, कोरियन, पोर्चुगिज, स्पेनिस, व टर्किस भासय् हीकेगु सेवा ब्यूगु खःसा वंगु १० दँ न्ह्यवंनिसें खस नेपाली भासय् हीकेगु सुरु जूगु खः ।
