यल – नेपाल संबत् १०९२ (वि.सं. २०२८) सालय् स्थानिय समुदायया सक्रियताय् ब्वनेगु संस्कृति विकास यायेगु तातुनाः पलिस्था जूगु यलया चन्द्रसूर्य पुस्तकालयं लुँबुन्हिया झ्वलय् जूगु ज्याझ्वः वइगु चौलागाः पन्चमि, मंगलबार (चैत २८ गते) क्वचायेकीगु जूगु दु । पुस्तकालयं म्हिगः कुतिसौगलय् पत्रकार सम्मेलन यानाः लुँबुन्हिया झ्वलय् जूगु फुक्क ज्याझ्वः चौलाथ्वः पन्चमि, मंगलबार (चैत २८ गते) बृहत ज्याझ्वः याना क्वचायेकेगु जानकारी ब्यूगु खः।
समापन ज्याभ्वलय् पलिस्था इलंनिसें योगदान याःपिं, आर्थिक ग्वाहालि याःगु संस्थालिसें व्यक्ति, लुँ बुन्हिया झ्वलय् जूगु थी थी ज्याझ्वःया कजित लगायतयात हनेगुया लिसें बृहत सांस्कृतिक ज्याझ्वः यायेगु धकाः पुस्तकालयया नायः राजेश चित्रकारं धयादिल।
थगुनेया चौला (चैत)य् लुँबुन्हिया ज्याझ्वः शुरू यानागु धासें वय्कलं पुस्तकालयं दच्छिया दुने हिदान, निशुल्क स्वास्थ्य शिविर, साहित्य वाचन, साइकल यात्रा, ब्याडमिन्टन धें धें बल्लाः कासा, भजन थज्याःगु ज्याझ्वः यानागु धयादिल।
अथे हे वय्कलं चन्द्रसूर्य पुस्तकालययात ईलाइब्रेरिया कथं विकास यायेत तयारि जूगु धयादिल ।
पत्रकार सम्मेलनय् पुस्तकालयया संस्थापक नायः रत्नमान चित्रकार, सल्लाहकार सनप्रकाश चित्रकार, न्वकू रूपक बाराही, छयाञ्जे राकेश श्रेष्ठ लिसेंया पदाधिकारीतय्गु ब्वति दुगु खः।
यलय् सामुदायिक स्तरं पलिस्था जूगु चन्द्रसूर्य पुस्तकालय लिसें मेगु यक्व पुस्तकालयतय्गु ग्वसालय् छगू इलय् यलन्यंकया न्ह्यसः लिसः कासा थज्याःगु बौद्धिक विकासया ज्याझ्वःत जुयाच्वंगु खःसा लिपांगु इलय् मेगु पुस्तकालयतय्गु अस्तित्व हे मदये धुंकुगु अवस्था दु ।
थौंकन्हय् चन्द्र सूर्य पुस्तकालय त्वःता मेगु पुस्तकालय सन्चालनय् वयाच्वंगु खने मदु । थुगु पुस्तकालयं ईया विकासक्रम लिसें शैक्षिक लागाय् जक मजुसें सामाजिक, खेलकुद, स्वास्थ्य, धार्मिक आदि थी थी लागाय् तकं ज्या याना वयाच्वंगु दु ।
