नेवाः ख्यलय् नांजाःगु संस्था बाखं दबूया ग्वसालय् म्हिगः थिंलाथ्वः दुतिया, सनिबारखुन्हु झीगु अःपुगु यइपुगु व न्ह्यइपुगु भाय् नेवाःभाय् खःकथं मद्वंक ब्वनेच्वये यायेत छगू प्रशिक्षण ज्याझ्वः जूगु दु ।
न्ह्यःखा, येँया कन्या मन्दिर स्कुलय् जूगु थुगु ज्याझ्वःया प्रशिक्षक पौभाः साय्मि जुयादी ।
बाखं दबूया ग्वसालय् थ्वयां न्ह्यः नं निक्वःतक थुजाःगु हे प्रशिक्षण ज्याझ्वः जूगु खः ।
बाखं दबूया संस्थापक जः लोचनतारा तुलाधरजुं ब्वति कयादीपिं सकसितं लसकुस यानादिसे बाखं दबूया थीथी ज्याखँ कनादीगुया लिसें नेवाःभासं च्वज्या यानादीपिन्सं खःकथं मद्वंक ब्वनेच्वये यायेमाःगुली बः बियादीगु दु ।
प्रशिक्षण ज्याझ्वःया लिपतय् प्रशिक्षक भाजु पौभाः साय्मियात अले थाय् चूलाका बियादीगुली कन्या मन्दिर स्कुलयात नं ल्वःवनापुसे च्वंगु मतिनाया चिं लःल्हायेगु ज्या जूगु खः ।
ब्वति कयादीपिं भाजु मय्जुपिन्सं न्ह्यइपुक स्यनेकने यायेखंगु व थुजाःगु महत्वपूर्ण ह्वःताः चूलाका बियादीगुली सुभाय् द्यछासे थुजाःगु ज्याझ्वः इलय् ब्यलय् जुयावं च्वनेमाः धकाः नं मन्तुना प्वंकादीगु खः ।
