विश्वकप २०२६ को समूह ‘जे’ अन्तर्गत बुधबार (असार ३) बिहान हुने अर्जेन्टिना र अल्जेरियाबीचको खेल फुटबल इतिहासकै एउटा सुनौलो पाना बन्ने निश्चित छ। नेपाली समयअनुसार बिहान ६:४५ बजे मिसौरीस्थित कन्सास रंगशालामा हुने यस खेलमा विश्वकै नजर कप्तान लियोनेल मेसी र उनको टोलीको ऐतिहासिक कीर्तिमानमा टिकेको छ।
अर्जेन्टिनी फुटबल सुपरस्टार लियोनेल मेसी आज मैदानमा उत्रिएसँगै विश्व फुटबल इतिहासमा नयाँ अध्याय लेख्ने तयारीमा छन्। यो खेल उनको करिअरको २००औँ अन्तर्राष्ट्रिय खेल हुनेछ भने उनी ६ वटा विश्वकप खेल्ने इतिहासकै पहिलो खेलाडी बन्नेछन्।
विश्वकप इतिहासमा मेसीको यो २७औँ खेल हुनेछ, जसले सर्वाधिक विश्वकप खेल्ने उनको कीर्तिमानलाई अझ मजबुत बनाउनेछ। यद्यपि ह्यामस्ट्रिङ समस्याका कारण उनी सुरुवाती ११ मा रहने वा नरहने विषयमा केही अन्योल कायम छ।
वर्तमान विश्वविजेता अर्जेन्टिना प्रशिक्षक लियोनेल स्कालोनीको नेतृत्वमा लगातार दोस्रो पटक विश्वकप उपाधि जित्ने लक्ष्यसहित मैदानमा उत्रिँदैछ। यदि अर्जेन्टिनाले उपाधि जित्न सफल भयो भने, इटाली र ब्राजिलपछि लगातार दुई विश्वकप जित्ने तेस्रो राष्ट्र बन्नेछ।
दक्षिण अमेरिकी छनोट चरणमा शीर्ष स्थान हासिल गरेको अर्जेन्टिनाले १८ खेलबाट ३८ अंक जोडेको थियो। छनोटमा मेसीले सर्वाधिक ८ गोल गरेका थिए। छनोटपछि खेलेका सात मैत्रीपूर्ण खेलमा अर्जेन्टिनाले २१ गोल गर्दै केवल एक गोल मात्र बेहोरेको छ।
अघिल्लो विश्वकपको पहिलो खेलमा साउदी अरेबियासँगको अप्रत्याशित हारबाट पाठ सिकेको अर्जेन्टिनाले यसपटक अफ्रिकी चुनौतीलाई हल्का रूपमा नलिने संकेत दिएको छ।
फिफा वरीयताको २८औँ स्थानमा रहेको अल्जेरिया आफ्नो पाँचौँ विश्वकप यात्रा खेलिरहेको छ। टोली विश्वकपमा प्रभावशाली पुनरागमन गर्ने लक्ष्यमा छ।
फ्रान्सेली फुटबल महानायक जिनेदिन जिदानका छोरा लुका जिदान अल्जेरियाको टोलीमा गोलकिपरका रूपमा समावेश छन्। उनी पहिलो रोजाइमा पर्ने वा नपर्ने विषय चासोको केन्द्र बनेको छ।
अल्जेरियाका फरवार्ड मोहम्मद अमौराले छनोट चरणमा १० गोल गरेका थिए। कप्तान रियाद माहरेज र अमौराको जोडी अर्जेन्टिनाका लागि मुख्य चुनौती रहने अपेक्षा गरिएको छ।
प्रशिक्षक भ्लादिमिर पेट्कोभिकको नेतृत्वमा रहेको अल्जेरियाले विश्वकपअघिका मैत्रीपूर्ण खेलमा नेदरल्यान्ड्सलाई समेत पराजित गर्दै उत्कृष्ट लय प्रदर्शन गरेको थियो।
अर्जेन्टिना र अल्जेरियाबीच सन् २००७ मा भएको एकमात्र मैत्रीपूर्ण खेलमा अर्जेन्टिनाले ४–३ को रोमाञ्चक जित निकालेको थियो। उक्त खेलमा मेसीले दुई गोल गरेका थिए।
अर्जेन्टिनाका गोलकिपर इमिलियानो मार्टिनेज, लियान्ड्रो पेरेडेज र निकोलस गोन्जालेज फिट भइसकेका छन्। तर लेफ्ट ब्याक निकोलस टालियाफिको चोटका कारण बाहिर रहने सम्भावना छ। उनको स्थानमा फाकुन्डो मेडिना वा भ्यालेन्टिन बार्कोले अवसर पाउन सक्छन्।
अल्जेरियाका मुख्य डिफेन्डर रामी बेन्सेबैनी घुँडाको चोटका कारण खेल गुमाउन सक्ने सम्भावना रहेको छ। उनको स्थानमा सामिर चेर्गुई वा जिनेद्दिन बेलाइद मैदानमा देखिन सक्छन्।
यदि अर्जेन्टिनाले पुनः विश्वकप उपाधि जित्न सफल भयो भने, मेसीको करिअर अझै एक ऐतिहासिक उचाइमा पुग्नेछ, जसलाई आगामी पुस्ताका फुटबलरहरूले भेट्न दशकौँ लाग्न सक्ने विश्लेषण गरिएको छ।
