येँ– नेवाः संस्कृति ल्यंकेगु तातुनाः उदाय् समाजया ग्वसालय् तःनिगः बःनिगः दयेकेगु स्यनेज्या जूगु दु। तालिम वंगु अनलाथ्वः एकादसि, सनिबार (श्रावण १३ गते)खुन्हु कसाः ख्यलय् जूगु खः ।
ज्याझ्वलय् प्रेमशोभा कसाः व शीलशोभा कसाःपिन्सं तःनिगः बःनिगः दयेकेत स्यनादीगु खः। स्यनेज्याय् प्रेमहिरा तुृलाधर, सुनिता तुलाधर, रजनी स्थापित, चांदनी स्थापितपिन्सं ग्वहालि यानादीगु खः ।
तःनिगः बःनिगः दयेके ज्याय् उदाय्तय्त नं सक्षम यायेगु निंतिं तालिमया ग्वसाः ग्वःगु खः। थौंया पुस्तापिन्सं कलात्मक ग्वःजा दयेके मसयाच्वंगु अवस्थाय् थुकथं थःगु मौलिकतां जाःगु ज्याखँत यानाः सकसितं उत्साहित यानाबीगु ज्या उदाय् समाजपाखें जूगु खः । उदाय्तसें न्ह्याका वयाच्वंगु तःजिगु पुजाय् तःनिगः बःनिगः ग्वःजा मदयेकं मगाःगुलिं नं उदाय् समाजं तालिमया ज्या न्ह्याकूगु खः ।
तालिमय् ७५ म्ह उदाय्तसें ब्वति काःगु खँ ज्याझ्वःया कजि रत्न कमल कसालं कनादिल । ज्याझ्वलय् प्रा. डा.नरेशमान बज्राचार्यं ग्वःजाया थी थी ताजिया विषययात कःघानाः तःनिगः बःनिगः ग्वःजाया महत्वयात कयाः न्वचू नं बियादीगु खः । ज्याझ्वलय् उदाय् समाजया मूदु्जःलिसें उदाय् म्यूजियमया कजि डा. सुमन कमल तुलाधरं लसकुस न्वचू बियादीगु खः । ज्याझ्वलय् उदाय् समाजया पदाधिकारी व दुजःपिन्सं नं माःमाःकथं स्यनेज्याय् तिबः बियादीगु दु ।
नेवाःतसें पुजाआजा यायेबलय् ग्वःजा दयेकाः द्यःपिन्त छायेगु ज्या याना वयाच्वंगुलिं ग्वःजायात पुजाज्वलंया रुपय् नं कयातःगु दु । नेवाःतसें साधारण पुजाय् चिग्वःगु ग्वःजा जक दयेकाः पुजाय् छ्यला च्वंगु दुसा ततःधंगु पुजाय् तःनिगः बःनिगः ग्वःजायात महत्व बियाः पुजाय् छ्यलाबुला याना वयाच्वंगु दु । तःनिगः बःनिगः ग्वजा दयेकेबलय् ग्वःजायात थी थी बां ज्यानाः कलात्मक रुपं दयेकेगु प्रचलन दु । थुकथं आकृतिया वस्तु दयेकेगु झ्वलय् स्वां, पशुपंक्षी, लिसेंया बां लुइकाः दयेकेगु नं चलन दु । स्वन्तिबलय् लक्ष्मी पुजाखुन्हु प्वचुंया लक्ष्मी द्यः, कुवेर, काउली लिसेंया बांया ग्वःजा दयेकाः लक्ष्मी द्यःयात छायेगु नं चलन दु ।
