नकतिति धया थें ‘त्वःफ्यूगु स्वापू’ नांया चिबाखं सफूया लिसें म्ह्व ईया दुने यइपुगु भासं थीथी विधाया न्यागू सफू पिथना दीधुंकूम्ह रीता महर्जनजुं थःगु जन्मन्हिया लसता ब्याकाः ‘नेपालभाषा चिबाखं साहित्य’लिसे जानाः चिबाखंयात कयाः म्हिगः ने.सं. ११४५ बछलाथ्वः पारु, सोमबारखुन्हु बःचाधंक सहलह ज्याझ्वः न्ह्याकादिल ।
ज्याझ्वलय् ब्वति कयाद्यूपिं सकसिनं च्वमि मय्जुयात जन्मन्हिया लसताय् भिन्तुना द्यछायेगु ज्या जूगुया लिसें जापानं झायादीम्ह प्रो. नरेश महर्जन व अमेरिकां झायादीम्ह जयम्बु रन्जितयात नेपालभाषा चिबाखं साहित्यया संयोजक नरेश अमात्यं खादा न्ययेकाः लसकुस यानादीगु अले नेपालभाषा चिबाखं साहित्यया दुजः व समिक्षक ध्रुब मधिकःमिं भाषा सम्पादक पौभाः साय्मियात मतिनाया चिं लःल्हायेगु ज्या नं जूगु खः ।
थुगु चिबाखं सफू ‘त्वःफ्यूगु स्वापू’यात कया जूगु बःचाधंगु समिक्षात्मक ज्याझ्वलय् ध्रुब मधिकःमि, वरिष्ठ संगीतकःमि अमरराज राजोपाध्याय, केदार सितु, विमल ताम्राकार, माणिक उराय्, नरेश अमात्य, पौभाः साय्मि लिसेंया साहित्य ह्यःमिपिन्सं चिबाखं व नेपालभाषा साहित्ययात कयाः थःथःपिनि बिचाः प्वंकादीगु खः ।
