काठमाडौं । जापानको उत्तरपूर्वी तटमा सोमबार ७.५ म्याग्निच्युडको भूकम्प गएको छ । भूकम्पबाट दुई दर्जनभन्दा बढी व्यक्ति घाइते भएका छन् । अधिकारीहरूले एक लाखभन्दा बढी मानिसहरूलाई सुरक्षित स्थानमा सार्ने आदेश जारी गरेका छन्।
अमेरिकी भूगर्भ सर्वेक्षण (युएसजीएस) का अनुसार, भूकम्प स्थानीय समय अनुसार राति ११:१५ बजे देशको उत्तरपूर्वी तटबाट लगभग ४४ माइल टाढा, लगभग ३३ माइल गहिराइमा गएको थियो ।
जापानको राजधानी टोकियोमा ४०० माइलभन्दा बढी टाढा र भूकम्पको समयमा ३० सेकेन्डभन्दा बढी समयसम्म चलेको शक्तिशाली भूकम्प महसुस गरिएको सीएनएनले जनाएको छ ।
जापान मौसम विज्ञान एजेन्सी (जेएमए) ले यस हप्ता जापानमा ‘८ म्याग्निच्युड वा सोभन्दा बढीको ठूलो भूकम्प’ आउन सक्ने सम्भावना रहेको चेतावनी दिएको छ, तर यो सम्भावना १ प्रतिशत मात्र रहेको बताएको छ।
भूकम्पपछि, जेएमएले प्रशान्त महासागरीय तट होक्काइडो, आओमोरी प्रिफेक्चर र इवाते प्रिफेक्चरमा सुनामीको चेतावनी जारी गरेको छ ।
जापानको अग्नि तथा प्रकोप व्यवस्थापन एजेन्सीले मंगलबार बिहानै १ लाख १४ हजारभन्दा बढी मानिसहरूलाई सुरक्षित स्थानमा सार्ने आदेश जारी गरिएको बताएको छ ।
जापानकी प्रधानमन्त्री साने ताकाचीले मंगलबार पत्रकारहरूलाई भूकम्पमा कम्तीमा ३० जना घाइते भएको बताएकी छन् । उनले यस्तै वा अझ शक्तिशाली भूकम्प आउन सक्ने चेतावनी दिएकी छन् ।
मंगलबार बिहान पत्रकार सम्मेलनमा मुख्य क्याबिनेट सचिव मिनोरु किहाराले आओमोरी प्रान्तबाट घाइते र आगलागीका धेरै रिपोर्टहरू आएको बताए ।
उनका अनुसार आओमोरी र इवातेमा बिजुली अवरुद्ध भएको छ र फुकुशिमा र आओमोरी बीचको उच्च गतिको रेल सेवा रोकिएको छ । एक्सप्रेसवेका केही खण्डहरू पनि बन्द गरिएको किहाराले बताए ।
रोयटर्स समाचार एजेन्सीको भिडियोमा आओमोरी प्रिफेक्चरको मुत्सु शहरमा क्षतिग्रस्त होटल र भवनहरू र क्षतिग्रस्त राजमार्गमा अड्किएको कार देखाइएको छ । यसअघि, किहाराले प्रभावित क्षेत्रका मानिसहरूलाई उच्च स्थानमा सर्न वा सुरक्षित भवनहरू र आश्रयस्थलमा सर्न आग्रह गरेका थिए ।
‘देशको हिगाशिदोरी र ओनागावा आणविक ऊर्जा केन्द्रहरूमा तत्काल असामान्य खबर आएको छैन ।’ किहाराले भने, ‘हामीले अन्य आणविक सुविधाहरूको जाँच भइरहेको रिपोर्ट प्राप्त गरेका छौं ।’
अक्टोबरमा निर्वाचित प्रधानमन्त्री ताकाइचीले आफ्नो सरकारले क्षतिको मूल्याङ्कन गर्न र आपतकालीन प्रतिक्रिया उपायहरू लागू गर्न स्थानीय अधिकारीहरूसँग नजिकबाट काम गर्ने बताइन् ।
उनले भनिन्, ‘सरकारले मानव जीवनलाई पहिलो स्थान दिने सिद्धान्तअन्तर्गत एकताको रूपमा काम गर्नेछ ।’
जापानमा गम्भीर भूकम्पहरू आउने कुनै नौलो कुरा होइन । यो प्रशान्त महासागरको दुवै छेउमा तीव्र भूकम्पीय र ज्वालामुखी गतिविधि भएको क्षेत्र, रिङ अफ फायरमा अवस्थित छ । हालैको जापानी इतिहासको सबैभन्दा खराब भूकम्प २०११ मा आएको ९.१ म्याग्निच्युडको तोहोकु भूकम्प थियो जसले ठूलो सुनामी र आणविक प्रकोप निम्त्यायो ।
उक्त भूकम्प र सुनामीले २२ हजारभन्दा बढी मानिसहरूको मृत्यु वा बेपत्ता पारेको थियो र फुकुशिमा दाइची आणविक ऊर्जा केन्द्रका रिएक्टरहरू पग्लिएर वरपरको क्षेत्रमा रेडियोधर्मी प्रदूषण फैलाएको थियो ।
