अमेरिका र इरानबीचको तनावले युद्धको नयाँ र भयावह मोड लिएको छ। पाकिस्तानको इस्लामाबादमा भएको उच्चस्तरीय वार्ता बिना निष्कर्ष टुङ्गिएपछि अमेरिकी राष्ट्रपति डोनाल्ड ट्रम्पले सोमबारदेखि इरानी बन्दरगाहहरूमा सैन्य नाकाबन्दी लागू गर्ने घोषणा गर्नुभएको छ।
इरानले आफ्नो आणविक कार्यक्रम त्याग्न अस्वीकार गरेको आरोप लगाउँदै ट्रम्प प्रशासनले रणनीतिक महत्त्वको होर्मुज जलमार्गमा कडा निगरानी बढाउने निर्णय गरेको हो।
अमेरिकी सेन्ट्रल कमान्डका अनुसार सोमबार १४०० GMT देखि अरब र ओमानको खाडी क्षेत्रका सबै इरानी बन्दरगाहमा हुने जहाजहरूको आवागमनमा पूर्ण रोक लगाइनेछ।
राष्ट्रपति ट्रम्पले यसलाई सीमित तर रणनीतिक कदम बताए पनि इरानले भने यसको कडा प्रतिकार गर्ने चेतावनी दिएको छ।
इरानी रिभोलुसनरी गार्ड्सले होर्मुज क्षेत्रमा आफ्नो पूर्ण नियन्त्रण रहेको दाबी गर्दै अमेरिकी कदमलाई ‘हास्यास्पद’ भनेको छ।
यो सैन्य तनावको सिधा असर विश्व बजारमा देखिन थालेको छ। तेलको मूल्य प्रति ब्यारेल १०० डलर आसपास पुगेको छ, जसले विश्वव्यापी महँगी र ऊर्जा संकट निम्त्याउने जोखिम बढाएको छ।
फेब्रुअरीदेखि जारी यो द्वन्द्वमा हजारौँले ज्यान गुमाइसकेका छन् भने पाकिस्तानको मध्यस्थता प्रयास पनि नाकाबन्दीको घोषणासँगै कमजोर बनेको विश्लेषण गरिएको छ।
