काठमाडौं, वैशाख १३ – आगामी तीन दिन देशको मौसममा देखिएको नाटकीय फेरबदलले जनजीवन प्रभावित हुने भएको छ।
मौसम पूर्वानुमान महाशाखाले जारी गरेको पछिल्लो विवरण अनुसार वैशाख १३ देखि १५ गतेसम्म देशका अधिकांश पहाडी र हिमाली क्षेत्रमा मेघगर्जन, चट्याङसहितको वर्षा र हिमपातको उच्च जोखिम देखिएको छ।
अर्कोतर्फ, तराईका फाँटहरूमा भने ‘तातो दिन’ (Hot Day) को सकस कायमै रहने भएको छ।
आज आइतबार कोशी, मधेश, बागमती र गण्डकी प्रदेशमा बदली भई चट्याङसहित मध्यम वर्षा हुनेछ भने हिमाली क्षेत्रमा हिमपातको सम्भावना छ।
यस्तै, सोमबार पनि कोशी, बागमती र गण्डकीका उच्च भू-भागमा वर्षा र हिमपातको क्रम जारी रहनेछ। मङ्गलबार भने प्रभाव थप विस्तार हुँदै लुम्बिनी, कर्णाली र सुदूरपश्चिमका पहाडी क्षेत्रमा समेत वर्षाको सम्भावना देखिएको छ।
मौसम विभागले विशेषगरी चट्याङको जोखिमप्रति गम्भीर बन्न नागरिकलाई सचेत गराएको छ।
खुला मैदान, अग्ला रूख र धातुका संरचनाबाट टाढै रहन विभागको चेतावनी छ।
तराईका बासिन्दाहरूले भने तातो हावा र चर्को घामबाट जोगिन विशेष सावधानी अपनाउनु पर्ने देखिएको छ।
