काठमाडौँ— माध्यमिक शिक्षा परीक्षा (एसईई) को चाप सकिएसँगै आज सोमबारदेखि कक्षा १२ को अन्तिम वार्षिक परीक्षा देशभर एकैसाथ सुरु भएको छ।
\राष्ट्रिय परीक्षा बोर्डले सार्वजनिक गरेको तालिका अनुसार बिहान ८ बजेदेखि परीक्षा सञ्चालन भइरहेको हो।
यस वर्ष देशभर तोकिएका १ हजार ४ सय २१ वटा परीक्षा केन्द्रबाट करिब ४ लाख १८ हजार ८ सय परीक्षार्थीहरू परीक्षामा सामेल भएका छन्।
परीक्षालाई मर्यादित, निष्पक्ष र व्यवस्थित बनाउन बोर्डले आवश्यक सुरक्षा व्यवस्था मिलाउनुका साथै प्रत्येक केन्द्रमा केन्द्राध्यक्षहरूलाई जिम्मेवारी तोकेर परिचालन गरेको जनाएको छ।
