लिओनल मेसी, किलियन एमबाप्पे र एर्लिङ हालान्डले फिफा विश्वकप २०२६ को सुरुआती खेलमा उत्कृष्ट प्रदर्शन गरे। त्यसैले सबैको ध्यान क्रिस्टियानो रोनाल्डोतर्फ केन्द्रित भएको थियो।
तर, पोर्चुगलका ४१ वर्षीय रोनाल्डो बुधबार विश्वकप अभियानको पहिलो खेलमा कंगोविरुद्ध खासै प्रभावशाली प्रदर्शन गर्न सकेनन्। उनले खेलभर २५ पटक बल छोए। २१ वटा पास दिए। त्यसमा १६ त ‘ब्याक’ पास थिए।
उनले दुई पटक प्रहार गरे पनि दुवै गोलपोस्ट बाहिर गए। गोलपोस्टको दिशामा एक पटक पनि प्रहार गर्न सकेनन्।
यस प्रदर्शनसँगै रोनाल्डो ठूला प्रतियोगितामा लगातार १० मा गोल गर्न असफल भएका छन्। त्यसकारण समर्थकहरू निराश देखिए। तर, पोर्चुगलका मुख्य प्रशिक्षक रोबर्टो मार्टिनेजले आफ्नो कप्तानप्रति पूर्ण विश्वास व्यक्त गरेका छन्।
‘जब टोलीलाई गोलको आवश्यकता हुन्छ, त्यतिबेला विश्व फुटबलकै उत्कृष्ट गोलकर्तालाई मैदानबाट बाहिर निकाल्नुको कुनै अर्थ हुँदैन। यस्ता परिस्थितिमा पेनाल्टी क्षेत्रभित्र क्रिस्टियानोको अनुभव हाम्रो लागि अत्यन्त महत्त्वपूर्ण हुन्छ। उनले विपक्षी डिफेन्डरहरूको ध्यान आफूतर्फ तान्छन्, जसले अन्य खेलाडीका लागि खाली स्थान सिर्जना गर्छ। हामी ती अवसरको उपयोग गर्न सक्छौं र त्यो टोलीका लागि निकै आवश्यक छ,’ उनी भन्छन्।
टेक्सासमा भएको खेलमा क्यामेराको ध्यान बारम्बार रोनाल्डोतर्फ केन्द्रित भएका थिए। तर, पोर्चुगलको पहिलो गोल भने उनले होइन, जोआओ नेभेसले उत्कृष्ट हेडमार्फत गरे। उक्त गोलका लागि पेड्रो नेटोले असिस्ट प्रदान गरेका थिए।
कंगोको पाँच सदस्यीय रक्षापंक्तिविरुद्ध स्पष्ट अवसर सिर्जना गर्न कठिन भएपछि पोर्चुगलले हाई बलको रणनीति अपनायो। फुलब्याकहरूको सहयोगमा लगातार क्रसहरू गरिए पनि त्यसबाट थप सफलता हासिल हुन सकेन।
खेलमा स्वर्गीय डियोगो जोटाको सम्झनामा विशेष सम्मान व्यक्त गरिएको थियो। उनका आमाबुबा रंगशालामा उपस्थित थिए। चोटका कारण पूर्ण रूपमा फिट नभएका रुबेन डियास सुरुआती टोलीमा थिएनन्।
यसको असर पोर्चुगलको रक्षापंक्तिमा देखियो। नेभेसको गोलबाट लिएको अग्रता पहिलो हाफको अतिरिक्त समयमा गुमाउनुपर्यो।
आर्थर मासुआकुको क्रसमा योआन विस्साले गोल गर्दै कंगोका लागि विश्वकप इतिहासकै पहिलो गोल गरे। त्यसपछि पोर्चुगलको टोली स्तब्ध बनेको देखिन्थ्यो।
