विश्व फुटबलमा लगातार ४३ खेलसम्म अपराजित रहेको स्पेनको ऐतिहासिक यात्रा अन्ततः इंग्ल्यान्डले समाप्त गरिदिएको छ। आइतबार राति म्याड्रिडस्थित मेट्रोपोलिटानो रंगशालामा भएको युईएफए नेसन्स लिगको खेलमा इंग्ल्यान्डले विश्वकप विजेता स्पेनलाई ३–२ गोलले पराजित गर्दै उसको अपराजित यात्रामा पूर्णविराम लगाएको हो।
सन् २०२४ मार्चमा कोलम्बियासँग १–० ले पराजित भएयता स्पेनले लगातार ४३ खेलसम्म हार बेहोरेको थिएन। यो पुरुष अन्तर्राष्ट्रिय फुटबलमा कुनै युरोपेली राष्ट्रको सबैभन्दा लामो अपराजित यात्रासमेत थियो। स्पेनको यो अपराजित यात्रामा सन् २०२४ को युरोकप र सन् २०२६ को विश्वकप उपाधि पनि समावेश थिए। यसबीच उसले लगातार उत्कृष्ट प्रदर्शन गर्दै आफूलाई विश्व फुटबलको शक्तिशाली टोलीका रूपमा स्थापित गरेको थियो।
सन् २०२५ को नेसन्स लिग फाइनलमा पोर्चुगलसँग पेनाल्टी सुटआउटमा पराजित भए पनि निर्धारित र अतिरिक्त समयको खेल २–२ को बराबरीमा सकिएकाले उक्त नतिजालाई हार मानिएको थिएन। त्यसैले इंग्ल्यान्डसँगको हार नै स्पेनको पछिल्लो अपराजित यात्राको वास्तविक अन्त्य बन्यो।
स्पेनको घरेलु मैदानमा भएको खेलमा इंग्ल्यान्डले पहिलो हाफको अन्तिम समयमा कप्तान ह्यारी केनको पेनाल्टी गोलबाट अग्रता लिएको थियो। दोस्रो हाफमा एज्री कोन्सा र बेन ह्वाइटले थप गोल गरेपछि इंग्ल्यान्ड ३–० ले अगाडि रह्यो। तर ६५औँ मिनेटमा इलियट एन्डरसनले रातो कार्ड पाएपछि इंग्ल्यान्ड १० खेलाडीमा सीमित भयो। त्यसको फाइदा उठाउँदै मिकेल ओयारजाबालले पेनाल्टीमा र निको विलियम्सले अर्को गोल गरेपछि स्पेन खेलमा फर्कने प्रयासमा जुटेको थियो। यद्यपि गोलरक्षक जेम्स ट्राफोर्डको उत्कृष्ट बचाउका कारण स्पेनले बराबरी गर्न सकेन।
यो जितसँगै इंग्ल्यान्डले नेसन्स लिगको समूह ‘ए३’ मा शीर्ष स्थानसमेत हासिल गरेको छ। दुवै टोलीले समान १५ अंक जोडे पनि गोल अन्तरका आधारमा इंग्ल्यान्ड अगाडि रह्यो। स्पेनलाई उसकै मैदानमा हराउनुका साथै उसको ४३ खेलको अपराजित यात्रामा पूर्णविराम लगाउनु इंग्ल्यान्डका लागि विशेष उपलब्धि बनेको छ। यस जितसँगै इंग्ल्यान्डले लगातार १०औँ अवे जितको कीर्तिमानसमेत बनाएको छ।
खेलमा इंग्ल्यान्डका लागि कप्तान ह्यारी केनले पहिलो हाफको ४५औँ मिनेटमा पेनाल्टीमार्फत गोल गर्दै टोलीलाई अग्रता दिलाएका थिए। त्यसपछि ५३औँ मिनेटमा डेक्लान राइसको कर्नरमा एज्री कोन्साले हेडरमार्फत दोस्रो गोल गरे भने ५७औँ मिनेटमा जुड बेलिङ्घमको पासमा बेन ह्वाइटले तेस्रो गोल थपे। ३-० ले पछि परेको अवस्थामा स्पेनले ६५औँ मिनेटमा मिकेल ओयारजाबालले पेनाल्टीमार्फत खेलमा फर्कने प्रयास गरेको थियो।
त्यसपछि ७५औँ मिनेटमा लमिन यमालको पासमा वैकल्पिक खेलाडी निको विलियम्सले गोल गर्दै अन्तर ३–२ मा झारे पनि स्पेनले बराबरी गर्न सकेन।
