नेपाल झायाच्वनादिपिं हलिं नेवाः दबूया जर्मन च्याप्टरया नायःलिसें दुजलं उराय म्यूजियमया अवलोकन भ्रमण याःगु दु। मंगलबार जर्मन च्याप्टरया नायः कुमार नापितलिसें दुजः ओम बनेपालिं उराय् समाजं न्ह्याका वयाच्वंगु उराय् म्यूजिमयया अवलोकन भ्रमण यानादीगु खः ।
वय्कपिन्त म्यूजियमया समिति दुजःपिं डा. सुमन कमल तुलाधर, भवानी तुलाधर व सुमित्रा तुलाधरं नेवाः परम्पराकथं सिन्हः तिका खादां क्वखायेकाः लसकुस यानादीगु खः। अथे हे उराय् समाजया मूछयाञ्जे रजनी तुलाधर, छयाञ्जे दिव्य स्थापित नं वय्कःपिन्त उराय् समाजपाखें लसकुस यानादीगु खः।
अथे हे वय्कःपिन्त समाजया पदाधिकारिपिंलिसें म्यूजियमलिसे स्वाना च्वनादीम्ह क्यानेडाया नागरिक इयान टर्नर नं नाप लानादीगु खः । थ्व फुक्क ज्या ताःलाकेत संचारकःमि विगेन तुलाधरजुं विशेष पहल यानादीगु खः। वय्कलं उराय् म्यूजियमया आःतकया प्रगति व समुदायस लानाच्वंगु प्रभावया खँय् जानकारि बियादीगु खः ।
अवलोकन यायेधुंकाः जर्मन च्याप्टरया नायः कुमार नापितलिसें दुजः ओम बनेपालीइ उराय् समाजं व म्यूजियमं थःगु सम्पदा व संस्कृति ल्यंकातयेगु निंतिं च्वछाये बहः जुगू ज्या यानाच्वंगु धासें थुकिया निंतिं थःपिन्सं नं ग्वाहालि यायेगु प्रतिवद्धता प्वंकादिल।
